Бирлашган Миллатлар Ташкилоти бош котиби Антониу Гутерриш Украинанинг Винница шаҳрига уюштирган ракета ҳужумида 22 нафар тинч аҳоли, жумладан, уч нафар бола ҳалок бўлгани ва юздан ортиқ киши жароҳатлангани ҳақидаги хабардан ларзага тушган. Бу ҳақда БМТ матбуот котиби журналистларнинг саволига жавобан айтиб ўтди.
Украинада сўнгги 24 соат ичидаги отишмалар Запорожье, Николаев ва Донецк вилоятининг бир қатор туманларида тинч аҳолининг қурбон бўлишига ва фуқаролик инфратузилмасининг вайрон бўлишига олиб келди, деди БМТ матбуот котиби ўринбосари Фархан Хак Нью-Йоркдаги брифингда.
«Уруш оқибатида муҳим инфратузилма вайрон қилинмоқда, миллионлаб одамлар тиббий ёрдамдан, шунингдек, сув, электр ва газдан маҳрум бўлмоқда», — деди БМТ вакили. Украина расмийлари Мариупол аҳолиси ҳафтасига киши бошига беш литр ичимлик суви олаётганини маълум қилган.
«Жаҳон Соғлиқни сақлаш ташкилоти вабо тарқалиши хавфи ҳақида огоҳлантирди, аммо ҳозирча инфекция ҳолатлари аниқланмаган», — дея қўшимча қилди Фархан Хак.
Украина бўйлаб 800 га яқин аҳоли пункти электр таъминотисиз, 230 мингдан ортиқ хонадон ва корхона газсиз қолган. Донецк вилояти аҳолиси ҳужумлардан энг кўп жабрланган.
Изоҳ (0)