Microsoft асосчиси Билл Гейтс ўзининг деярли барча бойлигини собиқ рафиқаси Мелинда билан ҳамкорликда ташкил этган хайрия фондига беришини маълум қилди.
«Мен бойлигимнинг деярли барчасини фондга беришни режалаштирганман. Мен пастга тушаман ва охир-оқибат дунёнинг энг бой одамлари рўйхатини тарк этаман», — деб ёзди Гейтс Twitter’да.
Сўнгги бир неча йил ичида деб ёзади Microsoft асосчиси дунё бир нечта даҳшатли зарбаларни бошдан кечирди, жумладан, коронавирус пандемияси ва Украинадаги уруш «кўплаб одамларни умидсизликка солди, дунё бундан ҳам баттар ҳолга тушиши мумкинми?»
«Аммо мен оптимистман», — деб тан олди Гейтс, у «зарарни юмшатиш ва дунё эришаётган тараққиётга қайтиш мумкинлигига ишонишини» қўшимча қилди.
Гейтснинг эслашича, 2000 йилда у рафиқаси билан хайрия ишларига йилига 6 миллиард доллар ажратадиган фонд ташкил қилган. «Бироқ замонимизнинг буюк инқирозлари барчамиздан янада кўпроғини талаб қилади», — деб ёзган Гейтс ва энди фонд хайрия ишларига ҳар йили 9 миллиард доллар ажратишини қўшимча қилди. Бунинг учун Microsoft асосчиси фондга 20 миллиард доллар тақдим этмоқчи.
«Мен ўз ресурсларимни жамиятга азоб-уқубатларни камайтириш ва ҳаётни яхшилашга энг катта таъсир кўрсатадиган усуллар билан қайтаришга мажбурман. Ва умид қиламанки, жуда бой ва имтиёзли лавозимдаги бошқа одамлар ҳам шу дақиқада олдинга қадам ташлайди», — деди Гейтс.
Фонд Билл ва Мелинда Гейтсларнинг номи билан аталса-да, Microsoft асосчисининг таъкидлашича, унга маблағларининг ярми инвестор Уоррен Баффет томонидан тақдим этилган. «Мен унинг дўстлиги ва етакчилигини қанчалик қадрлашимни ҳеч қачон етарли даражада ифода эта олмайман», — деб ёзган Гейтс.
Bloomberg Гейтснинг бойлигини 114 миллиард долларга баҳолайди ва уни дунёдаги тўртинчи энг бой одам, деб ҳисоблайди. Forbes’нинг реал вақт режимида янгиланадиган дунёдаги энг бадавлат бизнесменлари рейтингида Гейтснинг бойлиги 13 июль оқшомида 122,1 миллиард долларга баҳоланган, ушбу рейтингда ҳам Гейтс тўртинчи ўринни эгаллаган.
Изоҳ (0)