Ispaniya va Portugaliyada yuqori harorat qayd etilmoqda, hafta oxirigacha anomal issiqlik o‘rnatiladi. Meteorologlar esa o‘rmon yong‘inlari boshlanishi va keng tarqalishi xavfidan ogohlantirmoqda, deb yozadi “Interfaks”.
Portugaliyaning Alentejo viloyatida 13—14-iyul kunlari havo harorati 46 darajaga yetishi kutilmoqda. Ispaniyaning Kordova va Sevilya shaharlarida harorat 42 darajagacha ko‘tariladi, Pontevedra provinsiyasining xuddi shu nomdagi poytaxtida esa termometrlar 41 darajani ko‘rsatishi mumkin, ilgari ushbu hududda bunday yuqori harorat kuzatilmagan.
Pireney yarimoroli mamlakatlarining o‘t o‘chirish bo‘limlari shu haftadan o‘rmon yong‘inlariga qarshi kurashni boshlab yubordi, meteorologlar haroratning ko‘tarilishi fonida yong‘inlar kuchayib, yanada kengayishi mumkinligidan xavotirda.
Ispaniyaning bir necha aholi punktlarida 400 ga yaqin aholi evakuatsiya qilindi, o‘rmon yong‘inlari allaqachon 2,5 ming gektar maydonni qamrab olgan. Shu bilan birga, hududiy qishloq xo‘jaligi boshqarmasi boshlig‘i Begonya Garsiya Bernal yong‘in yaqin orada nazoratga olinmasligini aytdi. 300 ga yaqin o‘t o‘chiruvchilar va favqulodda vaziyatlar xizmati yong‘inni o‘chirishga jalb etilgan, ularga yordam berish uchun harbiy xizmatchilar ham jo‘natilgan.
Portugaliyada ham o‘t o‘chiruvchilar mamlakatning markaziy qismida, Santaren shahri yaqinida sodir bo‘lgan yong‘inni o‘chirishga harakat qilmoqda. Mamlakatdagi og‘ir vaziyat tufayli bosh vazir Antonio Koshta Mozambikga, prezident Marsel Rebelu de Souza esa Nyu-Yorkka safarini kechiktirishga qaror qildi.
Izoh (0)