Jahon sog‘liqni saqlash tashkiloti bosh direktori Tedros Adxanom Gebreyesus global koronavirus pandemiyasi hali tugamaganini aytdi. Uning so‘zlarini Sinhua keltirdi.
Tashkilot Yevropa mamlakatlariga keksalar, immuniteti zaif odamlar, homilador ayollar va tibbiyot xodimlariga COVID-19 vaksinasining ikkinchi buster dozasini berishni tavsiya qildi.
“Virusning yangi to‘lqinlari pandemiya tugamaganini va virus erkin tarqalayotganini, mamlakatlar kasallik yukini o‘z imkoniyatlaridan ko‘ra samarali boshqara olmayotganini yana bir bor ko‘rsatmoqda”, — dedi Gebreyesus.
JSST Sog‘liqni saqlash Favqulodda vaziyatlar dasturi ijrochi direktori Maykl Rayanning ta’kidlashicha, so‘nggi paytlarda COVID-19 ga chalinish holatlarining yana ko‘payishi, asosan, omikronning BA.4 va BA.5 subvariantlari hamda aholi salomatligini saqlash va ijtimoiy choralarning bekor qilinishi bilan bog‘liq. Test olish siyosatidagi so‘nggi o‘zgarishlar ham yangi kasallanish holatlarni aniqlash va virusni kuzatishga to‘sqinlik qilmoqda, dedi u.
“Men COVID-19 bilan kasallanganlar soni ortib borayotgani sog‘liqni saqlash tizimlari va tibbiyot xodimlariga qo‘shimcha bosim o‘tkazayotganidan xavotirdaman. Shuningdek, o‘limlar sonining ko‘payishi mumkinligidan xavotirdaman”, — dedi JSST rahbari.
U hukumatlarni ijtimoiy himoya, ventilyatsiyani yaxshilash, test olish va davolash protokollari kabi tasdiqlangan choralarni qo‘llashga, joriy epidemiologiyani kuzatish va yangi shtammlarning paydo bo‘lish potensialini aks ettirish uchun COVID-19 ga javob rejalarini muntazam ravishda tuzatishga chaqirdi.
Izoh (0)