АҚШда афроамерикалик Жорж Флойдни ўлдирган собиқ полициячи яна 20 йилга қамоққа ҳукм қилинди

2020 йилнинг майида афроамерикалик Жорж Флойдни ўлдирганлик учун ўтган йили 22,5 йилга қамоққа ҳукм қилинган собиқ полициячи Дерек Шовин Флойднинг фуқаролик ҳуқуқларини бузиш ҳақидаги алоҳида айблов бўйича яна 20 йилга озодликдан маҳрум қилинди, деб ёзади «РБК».

Полициячи афроамерикаликни 2020 йилнинг май ойида ҳибсга олиш чоғида ўлдирганди. Қўлга олиш пайтида Дерек Шовин тиззаси билан Флойднинг бўйнини босиб, саккиз дақиқача шу ҳолатда турган, афроамерикалик нафас ололмаётгани ҳақида бир неча марта айтгани кор қилмаган.

Бунинг ортидан мамлакат бўйлаб ҳуқуқ-тартибот органлари шафқатсизлиги ва ирқий тенгсизликка қарши оммавий норозилик намойишлари авж олди ва Black Lives Matter («Қора танлиларнинг ҳаёти муҳим») ҳаракати пайдо бўлди.

Собиқ полициячининг суд жараёни март ойининг охирида бошланди. Апрель ойида ҳакамлар ҳайъати Шовинни учта банд бўйича айбдор деб топди: қасддан содир этилмаган иккинчи даражали қотиллик (оғирлаштирувчи ҳолатларсиз), эҳтиётсизликдан одам ўлдириш ва инсон ҳаётига нисбатан бехосдан ўлимга олиб келадиган қўпол ҳурматсизлик.

Прокуратура Шовинни 30 йилга озодликдан маҳрум қилишни сўраган, улар Флойдни ҳибсга олишда полициячи томонидан қўлланилган усул ўлимга олиб келганини таъкидлади. Адвокатлар, ўз навбатида, Флойд полициячининг хатти-ҳаракати туфайли эмас, балки соғлиғи ва гиёҳванд моддаларни истеъмол қилгани сабабли вафот этганини даъво қилди.

Шовин Флойдга шундай муносабатда бўлгани ва унинг ёрдам ҳақидаги илтимосларини эътиборсиз қолдирганини суд Флойднинг фуқаролик ҳуқуқлари бузилиши деб топди. Шовин эркакнинг шикоятларини эшитганини, аммо барибир уни қўйиб юбормаганини, кейин эса унга ёрдам берилишига халақит қилганини тан олди. Собиқ полициячи ўз хатти-ҳаракатлари «нотўғри» бўлганига қўшилди. Айни вақтда суд чоғида Шовин қилмишига пушаймон бўлмади ва марҳумнинг оиласидан узр сўрамади.

Флойдни ўлдирганлик учун қамоқ муддатини Шовин штат даражасидаги иш бўйича, ҳуқуқларни бузганлик учун қамоқ муддатини эса — федерал даражадаги иш бўйича олди. Прокуратура унга қамоқ муддатларини бир вақтнинг ўзида ўташга рухсат берди.

Шовиндан ташқари, Флойднинг фуқаролик ҳуқуқларининг бузилиши ҳақидаги иш бўйича афроамерикаликнинг ўлими юз берган жойда бўлган яна уч нафар полициячи судланмоқда. Суд маслаҳатчилари уларни айбдор деб топди, ҳозир улар ҳукм чиқарилишини кутмоқда.