Ukraina Bosh prokuraturasi Turkiya hukumatidan bosib olingan Ukraina hududidan g‘alla tashiyotgani taxmin qilinayotgan Rossiya bayrog‘i ostidagi uchta kemani tekshirishni so‘radi, deya xabar bermoqda Reuters.
Ukraina prokurorlarining 13-iyun kuni Turkiya Adliya vazirligiga yo‘llagan maktubida Rossiya “Birlashgan kemasozlik korporatsiyasi”ning sho‘ba korxonasiga tegishli “Mixail Nenashev”, “Matros Pozynich” va “Matros Koshka” quruq yuk kemalari haqida so‘z yuritiladi.
Aprel-may oylarida kemalar Qrimning Sevastopol portidagi asosiy don terminalini tark etgan, ulardan ikkitasi trakerlarni o‘chirib qo‘ygan. Bosh prokuratura Anqaradan ularning yuklari va Turkiya portlariga yetib borishi haqidagi hujjatlarni so‘ragan. Kiyev quruq yuk kemalarida bosib olingan Xerson viloyatidan olib chiqilgan ukrain g‘allasi bo‘lishi mumkin, deb hisoblaydi.
Avvalroq, Ukraina Turkiyadan Rossiya Federatsiyasi bayrog‘i ostidagi, taxminan Zaporojye viloyatidagi Berdyansk portidan don ortib chiqqan “Jibek yo‘li” kemasini ushlab turishni talab qilgani ma’lum bo‘lgan edi. Keyinroq ushbu kema Qorasu porti yaqinida qo‘lga olingani haqida xabarlar paydo bo‘ldi. Biroq Rossiya TIV ma’lumotlariga ko‘ra, quruq yuk kemasi qo‘lga olinmagan, balki standart tekshirish tartib-qoidalari, jumladan fitosanitar nazoratdan o‘tkazilmoqda, shundan so‘ng unga Turkiya portiga kirishga ruxsat beriladi yoki taqiqlanadi.
Turkiya tashqi ishlar vazirligi Ukraina prokuraturasining so‘rovlariga rasman izoh berishdan bosh tortdi.
Izoh (0)