Украина Бош прокуратураси Туркия ҳукуматидан босиб олинган Украина ҳудудидан ғалла ташиётгани тахмин қилинаётган Россия байроғи остидаги учта кемани текширишни сўради, дея хабар бермоқда Reuters.
Украина прокурорларининг 13 июнь куни Туркия Адлия вазирлигига йўллаган мактубида Россия «Бирлашган кемасозлик корпорацияси»нинг шўъба корхонасига тегишли «Михаил Ненашев», «Матрос Позйнич» ва «Матрос Кошка» қуруқ юк кемалари ҳақида сўз юритилади.
Апрель май ойларида кемалар Қримнинг Севастопол портидаги асосий дон терминалини тарк этган, улардан иккитаси тракерларни ўчириб қўйган. Бош прокуратура Анқарадан уларнинг юклари ва Туркия портларига етиб бориши ҳақидаги ҳужжатларни сўраган. Киев қуруқ юк кемаларида босиб олинган Херсон вилоятидан олиб чиқилган украин ғалласи бўлиши мумкин, деб ҳисоблайди.
Аввалроқ, Украина Туркиядан Россия Федерацияси байроғи остидаги, тахминан Запорожье вилоятидаги Бердянск портидан дон ортиб чиққан «Жибек йўли» кемасини ушлаб туришни талаб қилгани маълум бўлган эди. Кейинроқ ушбу кема Қорасу порти яқинида қўлга олингани ҳақида хабарлар пайдо бўлди. Бироқ Россия ТИВ маълумотларига кўра, қуруқ юк кемаси қўлга олинмаган, балки стандарт текшириш тартиб-қоидалари, жумладан фитосанитар назоратдан ўтказилмоқда, шундан сўнг унга Туркия портига киришга рухсат берилади ёки тақиқланади.
Туркия ташқи ишлар вазирлиги Украина прокуратурасининг сўровларига расман изоҳ беришдан бош тортди.
Изоҳ (0)