UFC yulduzi Hamzat Chimayev UFC 308 turnirida Robert Uittakerning g‘alaba qozonish imkoniyati bo‘lmaganini ta’kidladi. Asli dog‘istonlik jangchining so‘zlariga ko‘ra, u birinchi daqiqalardayoq bellashuvni muddatidan avval yakunlashiga ishonch hosil qilgan.
Menimcha, Uittaker men bilan jangda g‘alaba qozona olmasdi. Odatda odamlar meni birinchi raundda to‘liq kuchini ishga soladigan sportchi deb bilishadi. Agar jangni tez tugatish imkoni bo‘lsa, albatta, shunday qilaman. U bilan ham shunday bo‘ldi. Bir daqiqadan so‘ng Robertni unchalik kuchli emasligini tushundim. Shu bois jangni tezroq tugatishga harakat qildim va uddaladim, — dedi Chimayev UFC’ning YouTube-kanaliga bergan intervyusida
Shuningdek, Hamzat UFC sportchilari va Olimpiya chempionlari o‘rtasidagi farqni aytdi:
Odamlar UFC jangchilari bilan Olimpiya chempionlari o‘rtasidagi katta farqni bilishmaydi. Agar men Olimpiya chempioniga qarshi chiqadigan bo‘lsam, u meni yanchib tashlaydi, — deya qo‘shimcha qildi u.
Hamzat Chimayev va Robert Uittaker o‘rtasidagi jang UFC 308 turnirida bo‘lib o‘tgan. Asli Chechenistondan bo‘lgan shvetsiyalik jangchi birinchi raunddayoq bo‘g‘ish usuli bilan g‘alaba qozondi. Bu g‘alaba Chimayevga o‘rta vazn toifasida chempionlik jangiga yo‘l ochdi. U 2025-yil 16-avgustda Chikago shahridagi “United Center” sport majmuasida o‘tkaziladigan UFC 319 turnirida hozirgi chempion Drikus dyu Plessi bilan jang qiladi.
Izoh (0)