Ukraina prezidenti Vladimir Zelenskiy mamlakat Turkiya va BMT bilan ukrain doni eksporti masalasida muzokaralar olib borayotganini ma’lum qildi, deb yozadi “Interfaks”.
“Haqiqatan ham, biz hozir Turkiya tomoni bilan va BMT bilan muzokaralar olib boryapmiz. Portlarimizdan don chiqib ketishi xavfsizligi uchun mas’ul bo‘lgan vakillarimiz… Bevosita bosh kotib Antoniu Gutterish bilan ishlayapmiz”, — dedi Zelenskiy Shvetsiya bosh vaziri Magdalena Anderson bilan Kiyevda tashkil qilingan brifingda.
Uning so‘zlariga ko‘ra, “eng muhim narsa — biz ishonmaydigan Rossiyadan tashqari kimdir bu yerga qandaydir oziq-ovqat mahsulotini ortib ketish uchun keladigan u yoki bu davlatlar kemalari xavfsizligini kafolatlashi kerak”. “Aynan shu haqda hozir Turkiyada muzokaralar olib borilmoqda”, — dedi Zelenskiy.
Shu bilan birga, BMT, Zelenskiy ta’kidlashicha, bu masalada yetakchi pozitsiyaga ega. “Ular, bizningcha, bu jarayonga boshchilik qilishga tayyor”, — dedi prezident.
“O‘z navbatida biz ham vaqtni yo‘qotmayapmiz va donimiz eksporti bo‘yicha turli yo‘llar, ham temiryo‘l, ham daryo yo‘li ustida ishlayapmiz. Biz kundan kunga eksportni oshiryapmiz. Bu oson emas, sharoitlar qiyin”, — deya qo‘shib qo‘ydi Zelenskiy.
Rossiyaning pozitsiyasi
Bu orada Rossiya prezidenti Vladimir Putin 30-iyun kuni Rossiya ukrain donining olib chiqib ketilishiga to‘sqinlik qilmayotgani, Kiyevning o‘zi portlarni minalardan tozalashi kerakligini aytgandi. “Ukraina harbiy hukumati o‘z portlariga olib boradigan yo‘llarga minalar joylashtirgan, ularga minalarni tozalashga va u yerdan don ortilgan kemalarni chiqarib ketishga hech kim xalal bermayapti”, — deya aniqlik kiritdi Putin.
U, shuningdek, ukrain donini olib chiqib ketishning boshqa yo‘llariga ham e’tibor qaratdi. “Ruminiya, Dunay orqali, undan keyin Qora dengiz, Polsha, Belarus bilan, Azov dengizi portlari orqali”, — dedi Putin.
Rossiya Mudofaani boshqarish milliy markazi boshlig‘i Mixail Mizinsev 1-iyul kuni Kiyev hukumati 16 ta mamlakatdan kelgan 70 ta chet el kemasining ochiq dengizga chiqish yo‘lini to‘sib qo‘yganini ma’lum qildi. “Rasmiy Kiyev tomonidan yaratilgan o‘qqa tutish xavfi va yuqori mina xavfi kemalarga to‘siqsiz ochiq dengizga chiqishga imkon bermayapti”, — dedi Mizinsev.
Uning so‘zlariga ko‘ra, Rossiya Qurolli kuchlari tomonidan ikkita dengiz gumanitar yo‘laklari ishlab turishi uchun zarur sharoitlar yaratilgan, ular kemalar harakati uchun xavfsizdir.
Izoh (0)