Soliq maslahatchisining vakolat va xizmat turlari kengaytirilishi belgilanmoqda

Bugun, 5-iyul kuni Senatning Budjet va iqtisodiy islohotlar masalalari qo‘mitasi tomonidan “Soliq maslahatiga oid faoliyat to‘g‘risida”gi qonun loyihasi muhokama qilindi. Bu haqda “Daryo” muxbirini xabar bermoqda.

Ma’lum qilinishicha, 2006-yilda qabul qilingan “Soliq maslahati to‘g‘risida”gi qonun bugungi soliq munosabatlari talablariga javob bermaydi. Shu sababli qonunni yangilash zarur. Yig‘ilishda ishtirok etgan Moliya vaziri o‘rinbosari Dilshod Sultonov yangi qonun loyihasining mazmuni to‘g‘risida gapirdi.

Qonunning asosiy maqsadi – soliq maslahatini rivojlantirish. Oldin bu tizimni Moliya vazirligi tartibga solar hamda litsenziya berar edi. Endi bu vakolat o‘zini o‘zi boshqarish organlari yoki Soliq maslahatchisi palatasiga beriladi. Moliya vazirligi esa regulyator bo‘lib qoladi. Mazkur qonun 24-may kuni Qonunchilik palatasi tomonidan qabul qilingan. Hujjatda 2006-yilda qabul qilingan “Soliq maslahati to‘g‘risida”gi qonunni bekor qilish taklif etilmoqda.

Qonunda jahon tajribasidan kelib chiqib, soliq maslahatchisi sohasini tartibga solish jamoatchilik tashkilotlariga, ya’ni Soliq maslahatchisi palatasiga topshiriladi. Palataga Moliya vazirligi bir qator funksiyalarni o‘tkazmoqda. Xususan, tashkilotga soliq maslahatchisiga malaka sertifikatini berish, imtihondan o‘tkazish, qayta rasmiylashtirish, o‘qitish va ularning malakasini oshirish vakolatlari beriladi. Soliq maslahatchisi reyestri yuritiladi. Shuningdek, soliq maslahatchisi xizmati turlari kengaymoqda. Ya’ni ularga bir qator huquqlar berilmoqda. Soliq maslahatchisi sertifikatini olish uchun talablar yengillashtirilmoqda. Avvallari 3 yil staj talab qilinardiyu. Endi buni 2 yilga tushirdik. Sohaga kirib kelishini yengillashtirdik.

Dilshod Sultonov, Moliya vaziri o‘rinbosari