Keyingi haftalarda omikron” shtammining yangi mutatsiyalari keng tarqalishi tufayli Yevropa va Amerikada kasallanish holatlari soni ortishi kuzatilmoqda.
Rossiyaning N.F.Gamaleya nomidagi Milliy epidemiologiya va mikrobiologiya ilmiy-tadqiqot markazi bosh ilmiy xodimi, virusolog A.Altshteyn fikricha, hozir dunyoda pandemiyaning yangi to‘lqini boshlangan.
“Bunga avvalgi mutatsiyalarga nisbatan tezroq tarqalayotgan subvariantlar sabab bo‘lyapti”, — deydi olim. — Ularga VA.3, VA.4, VA.5 singari nomlar berilgan.
Oqibatda dunyo bo‘yicha kuniga o‘rtacha 700-800 ming kishi COVID-19 ni yuqtirmoqda. Shunga qaramay, o‘lim ko‘rsatkichlari keskin pasaygani ijobiy holat.
Masalan, koronavirusning Uxan varianti tarqalgan paytda xastalik asoratlari tufayli hayotdan ko‘z yumayotganlar soni ancha yuqori — jami bemorlarning 5-6 foiziga teng edi.
To‘g‘ri, o‘sha paytda yangi paydo bo‘lgan bu noma’lum kasallikni davolash borasida hali yetarli tajriba bo‘lmagan. Ammo bu o‘rinda virusning biologiyasi ham hal qiluvchi ahamiyat kasb etgandi.
Asta-sekin o‘lim ko‘rsatkichlari 2 foizgacha kamaydi. Delta shtammi tarqala boshlaganda, bemorlarning 1,5 foizi vafot etishi qayd etildi. Omikron shtammida esa bu raqamlar 0,5-0,4 foizgacha tushdi”.
Virusologning ta’kidlashicha, joriy yil boshida ko‘plab mamlakatlarda epidemiologik vaziyat yomonlashib, dunyo aholisi koronavirusning yangi to‘lqiniga duch keldi.
Keyin esa kasallanishlar soni sekin-asta pasaydi. Ammo ko‘p o‘tmay omikronning VA.2 versiyasi tufayli yana o‘sish dinamikasi qayd etila boshladi.
“Hozir dunyo navbatdagi murakkab epidemiologik vaziyat bilan yuzma-yuz keldi, — deydi A.Altshteyn. — Lekin, o‘ylashimcha, uning asoratlari avvalgidek katta bo‘lmaydi. Chunki virus borgan sari zaiflashmoqda”.
Shunga qaramay, mutaxassislar koronavirusga qarshi to‘liq bosqichda va buster dozada emlanish kasallikdan himoyalanishning eng samarali yo‘li, degan qat’iy va yakdil xulosada.
Izoh (0)