Janubiy Koreya Seul meriyasi “Do‘stlik” bog‘ining hududida joylashgan “Seul” bog‘ini rekonstruksiya qilishga mablag‘ ajratmoqchi.
Bu haqda 4-iyul kuni Toshkent shahar hokimining turizm, madaniy meros va ommaviy kommunikatsiyalar masalalari bo‘yicha o‘rinbosari Faxriddin Davrukov va Janubiy Koreya elchixona maslahatchisi Kuch Chan Xyon boshchiligidagi delegatsiya ishtirokidagi uchrashuvda ma’lum bo‘ldi.
Toshkent shahar hokimligining xabar berishicha, Seul meriyasi “Do‘stlik” bog‘ining hududida joylashgan “Seul” bog‘ini rekonstruksiya qilishni, shu jumladan, uni yangi uskunalar bilan qo‘shimcha jihozlashni rejalashtirgan. Loyiha ustida ishlash uchun meriya konsalting kompaniyasini jalb etgan bo‘lib, uning mutaxassislari bog‘ni ko‘zdan kechirib, loyihaning ustuvor yo‘nalishlarini va o‘z mulohazalarini Toshkent shahar hokimligi rahbariyati bilan muhokama qildi.
Muloqot davomida hokim o‘rinbosari xo‘jalik masalalari bo‘yicha ham (yoritish, sug‘orish, cherepitsa, suv havzasi uchun filtrlar), bog‘dan samarali foydalanish, koreys madaniyatini targ‘ib etishga qaratilgan madaniy va ko‘ngilochar tadbirlar, aksiyalar va boshqalarni o‘tkazish yuzasidan ham qator takliflarini bildirgan.
Taraflar bog‘ni jihozlash borasida kelishib, undan foydalanishning samaradorligini oshirish bo‘yicha takliflarni qo‘llab-quvvatlagan.
Ma’lumot uchun, Toshkentdagi “Seul bog‘i” 2010-yil fevralida Toshkent va Seul shaharlari ma’muriyatlari vakillari o‘rtasida imzolangan kelishuvga ko‘ra 2014-yilda ochilgan. Ushbu bog‘ning umumiy maydoni 17,5 gektarni, ko‘kalamzorlashtirilgan hudud 7 gektarni tashkil etadi.
Izoh (0)