Yangi kun texnologiyalari — qanday qilib oddiy kvadrokopterlar urush usullarini o‘zgartirmoqda?

The Economist Rossiya va Ukraina harbiy texnika sifatida kvadrokopterlardan qanday foydalanayotgani haqida ma’lumot berdi.

Kvadrokopterlar 2010-yilda Fransiyaning Parrot kompaniyasi tomonidan 400 grammlik AR.Drone ishlab chiqarilganidan so‘ng ommalashib ketgan.

2013-yilda Xitoy “dji” startapi tomonidan ishlab chiqarilgan Phantom bozorni tubdan o‘zgartirdi — u GoPro videokamerasi orqali ommaga arzon aerofotosurat olish imkonini berdi.

“dji” o‘shandan beri kvadrokopterlar bozorida hukmronlik qilmoqda. Uning so‘nggi versiyalari bir necha kilometr masofa va to‘siqlardan aylanib o‘tish imkoniyatiga ega.

Bunday afzalliklarga ega kvadrokopterlar urushda foydali va hozir Ukrainada katta rol o‘ynamoqda.

Fevral oyida Ukraina Mudofaa vazirligi fuqarolardan kvadrokopterlarini qurolli kuchlarga topshirishni so‘ragan. Ma’lumotlarga ko‘ra, buni bir necha ming odam amalga oshirgan.

Hozir kvadrokopterlar artilleriyada qo‘llanilmoqda. Yerdan dushmanning joylashishini aniqlash va unga to‘g‘ridan to‘g‘ri o‘q otish qiyin.

Kvadrokopterdan esa bu juda oson — operator dushmanni topgach, balandlikdan o‘q otishni boshqaradi.

Agar ilgari bitta pozitsiyani yo‘q qilish uchun 60-90 marta o‘q uzish kerak bo‘lgan bo‘lsa, hozir 9 ta yetarli.

Kvadrokopterlar tankga qarshi bombalarni tashlash uchun kichkinalik qiladi, ammo granatalarga quvvati yetadi.

Bundan tashqari, ukrainaliklar Rossiya tanklarini topish va ta’qib qilish uchun kvadrokopterlardan foydalanmoqda.

“dji” o‘z mahsulotlarini har qanday harbiy maqsadlarda foydalanilishini rasman qoralab, aprel oyida Ukraina va Rossiyada kvadrokopterlarni sotishni to‘xtatgan.

Ammo bu boshqa kompaniyalar uchun yangi imkoniyat bo‘ldi. Masalan, Parrot darhol harbiy bozor uchun kvadrokopterlarni ishlab chiqarishni yo‘lga qo‘ydi. Ularning ba’zilari Ukraina kuchlari tomonidan ishlatila boshlangan.