Янги кун технологиялари — қандай қилиб оддий квадрокоптерлар уруш усулларини ўзгартирмоқда?

The Economist Россия ва Украина ҳарбий техника сифатида квадрокоптерлардан қандай фойдаланаётгани ҳақида маълумот берди.

Квадрокоптерлар 2010 йилда Франциянинг Parrot компанияси томонидан 400 граммлик АR.Drone ишлаб чиқарилганидан сўнг оммалашиб кетган.

2013 йилда Хитой «джи» стартапи томонидан ишлаб чиқарилган Phantom бозорни тубдан ўзгартирди — у GoPro видеокамераси орқали оммага арзон аэрофотосурат олиш имконини берди.

«джи» ўшандан бери квадрокоптерлар бозорида ҳукмронлик қилмоқда. Унинг сўнгги версиялари бир неча километр масофа ва тўсиқлардан айланиб ўтиш имкониятига эга.

Бундай афзалликларга эга квадрокоптерлар урушда фойдали ва ҳозир Украинада катта рол ўйнамоқда.

Февраль ойида Украина Мудофаа вазирлиги фуқаролардан квадрокоптерларини қуролли кучларга топширишни сўраган. Маълумотларга кўра, буни бир неча минг одам амалга оширган.

Ҳозир квадрокоптерлар артиллерияда қўлланилмоқда. Ердан душманнинг жойлашишини аниқлаш ва унга тўғридан-тўғри ўқ отиш қийин.

Квадрокоптердан эса бу жуда осон — оператор душманни топгач, баландликдан ўқ отишни бошқаради.

Агар илгари битта позицияни йўқ қилиш учун 60-90 марта ўқ узиш керак бўлган бўлса, ҳозир 9 та етарли.

Квадрокоптерлар танкга қарши бомбаларни ташлаш учун кичкиналик қилади, аммо гранаталарга қуввати етади.

Бундан ташқари, украиналиклар Россия танкларини топиш ва таъқиб қилиш учун квадрокоптерлардан фойдаланмоқда.

«джи» ўз маҳсулотларини ҳар қандай ҳарбий мақсадларда фойдаланилишини расман қоралаб, апрель ойида Украина ва Россияда квадрокоптерларни сотишни тўхтатган.

Аммо бу бошқа компаниялар учун янги имконият бўлди. Масалан, Parrot дарҳол ҳарбий бозор учун квадрокоптерларни ишлаб чиқаришни йўлга қўйди. Уларнинг баъзилари Украина кучлари томонидан ишлатила бошланган.