O‘zbekistondagi dam olish maskanlarida xizmat ko‘rsatish narxlari nega qimmat? Vazir o‘rinbosari javob berdi

O‘zbekistondagi dam olish maskanlari, xususan, Bo‘stonliq tumanidagi turistik hududlarda sayyohlarga xizmat ko‘rsatish narxlari ancha qimmat. Ayrim ijtimoiy tarmoq foydalanuvchilari u yerlarda dam olish xarajatlarini Turkiya yoki sayyohlarga xizmat ko‘rsatish salohiyati yuqori bo‘lgan boshqa mamlakatlardagi narxlarga tenglashtiradi. Xo‘sh, buning sabablari nimada? Turizm va madaniy meros vaziri o‘rinbosari Botirjon Shahriyorov jurnalistlar bilan suhbatda ushbu savolga javob qaytardi.

Botirjon Shahriyorovning aytishicha, tizimdagi asosiy muammo – talab va taklif muvozanatining hali iziga tushmagani bilan bog‘liq.

Bizda bilasiz turizm sohasi endi rivojlanayotgan tarmoq sifatida shakllanyapti. “Chorvoq”qa borib dam olib kelish nuqtayi nazardan aytsak, hammamiz vaqtimiz bo‘lsa, tabiat qo‘yniga chiqishni xohlaymiz. Albatta, u yerda talabga nisbatan taklif juda kam. Ya’ni turistik xizmat ko‘rsatuvchi obyektlarimiz bugungi kunda yetarli darajada emas. Raqobat bo‘lmasa, taklif kam bo‘lsa, albatta, ular o‘z narxlarini aytishga ko‘proq manfaatdorlik ko‘radi. Chunki buni xususiy turistik xizmatlar ko‘rsatuvchi obyektlar – dachami, oromgoh yoki dam olish zonasimi, bugungi kunda davlat tasarrufida bo‘lgan bunday dam olish maskanlari mavjud emas. Ularning barchasi xususiy sektorga tegishli. Shuning uchun ham narxlarni xususiy sektorning o‘zi belgilaydi.

Narxlarni belgilash borasida qandaydir nazorat tizimi bozordan, talab va taklifdan kelib chiqib belgilanadi. Endi Turkiyaga kelsak. Bugun Turkiyada turizm bo‘yicha yaratilgan shart-sharoitlarni O‘zbekistonnikini bilan taqqoslashga ojizmiz. Chunki u darajaga yetishimiz uchun hali ko‘p ish qilishimiz kerak. Hamma gap shunda. Turkiya keyingi 100-yil davomida rivojlangan. 2016—2017-yilda bizda Istanbulga avireslarni qo‘yishning o‘zi muammo bo‘lgan. Bugungi kunda nafaqat Toshkentga, balki Samarqand, Urganch, Buxoro shaharlariga Turkiyadan to‘g‘ridan to‘g‘ri aviareyslar qatnovi qo‘yilgan. Biz bu yo‘nalishlarda ishlayapmiz. Turkiyaga boradigan, asosiy narx aviatsiya. Shuning uchun biz xorijiy aviakompaniyalar bilan ishlab, ularni ham qo‘shimcha reyslarini qo‘yib, narxni barqarorlashtirishmiz mumkin bo‘ladi.

Botirjon Shahriyorov, Turizm va madaniy meros vaziri o‘rinbosari

Hozir O‘zbekistonda 1 ming 500 ga yaqin turistik kompaniyalar bor. Ya’ni ular soni 2016-yilga nisbatan 5-6 barobarga ko‘paygan. Ular nega ko‘payadi? Albatta, sohada daromad yaxshi bo‘lsa. Shunday kompaniyalar ochildimi, turizmni rivojlantirish imkoni paydo bo‘ladi. Keyingi masala, aholi daromad darajasini oshirish. Joylarda ishlab chiqarishga, fermer xo‘jaliklari, klasterlar tashkil etishga e’tibor kuchaygan. Bu ham bo‘lsa, aholini ish bilan ta’minlash orqali daromad olishi uchun sharoit yaratishga harakat. Shunda odamlarda dam olishga ham imkoniyat bo‘ladi. Bu, albatta, bir kunda bo‘lmaydi. Shu bilan birga, oldimizda transport logistikasi masalasi turibdi. Toshkentdan Samarqand yoki Buxoroga sayohatga chiquvchilar e’tiborga olinsa, bugun transport xizmatimiz talabga to‘liq javob bera olmaydi. Masalan, poyezdga chipta olish talabi bilan chiqsangiz, chipta topa olmaysiz, aviatsiya bo‘yicha ham shu holat. Aholining sayohat qilishga talabi kuchaygani sari transport xizmatiga bo‘lgan talab ham ortadi. Bugun transport sohasini rivojlantirishga ham alohida etibor berishi zarur. Qo‘shimcha poyezdlar, avtobuslar, aviareyslarni yo‘lga qo‘yish ustida ishlashimiz kerak bo‘ladi. Bu, albatta, Turizm va madaniy meros vazirligining ishi emas. Bu transport vazirligi, boshqa tashkilot va idoralar bilan bog‘liq masala hisoblanadi.