O‘zbekiston ikki hafta ichida Ukrainaga 45 tonna tarvuz eksport qildi

So‘nggi ikki hafta ichida O‘zbekiston tarvuz eksporti bo‘yicha rekordlarni yangilashda davom etdi. 

Shu vaqt oralig‘ida 35 ming tonnadan ziyod tarvuz eksport qilindi. Bu haqda EastFruit xabar bermoqda.

Ikki hafta davomida O‘zbekiston Ukrainaga 45 tonna tarvuz eksport qilgan. Umumiy eksport hajmining qariyb 99 foizi YOII mamlakatlari bozorlariga jo‘natildi.

O‘zbekiston Bojxona qo‘mitasining dastlabki ma’lumotlariga ko‘ra, 2022-yilning 16-mayidan 30-iyuniga qadar O‘zbekistondan 63,4 ming tonna tarvuz eksport qilingan. 

Bu 2021-yilning shu davriga nisbatan 3,1 barobar ko‘pdir. 2018—2020-yillarning xuddi shu davrida O‘zbekiston tarvuz eksporti hajmi 3 ming tonnadan oshmagan. 

Joriy mavsum boshidan buyon bir yarim oy ichidagi eksport hajmi 2018—2020-yillardagi ko‘rsatkichlardan kamida 20 barobar ko‘p bo‘ldi.

2022-yilning 1-iyul holatiga ko‘ra, tarvuzni daladan jo‘natish narxlari nav, sifat va mamlakat hududiga qarab, saralash hamda transportga yuklash xarajatlari hisobga olinmaganda kilogramiga 500-1000 so‘m oralig‘ida o‘zgarib turibdi. 

Avvalroq 2022-yilning iyun oyi o‘rtalarida O‘zbekiston rekord darajada tarvuz eksport qilayotgani haqida xabar berilgan edi.