Сўнгги икки ҳафта ичида Ўзбекистон тарвуз экспорти бўйича рекордларни янгилашда давом этди.
Шу вақт оралиғида 35 минг тоннадан зиёд тарвуз экспорт қилинди. Бу ҳақда EastFruit хабар бермоқда.
Икки ҳафта давомида Ўзбекистон Украинага 45 тонна тарвуз экспорт қилган. Умумий экспорт ҳажмининг қарийб 99 фоизи ЁИИ мамлакатлари бозорларига жўнатилди.
Ўзбекистон Божхона қўмитасининг дастлабки маълумотларига кўра, 2022 йилнинг 16 майидан 30 июнига қадар Ўзбекистондан 63,4 минг тонна тарвуз экспорт қилинган.
Бу 2021 йилнинг шу даврига нисбатан 3,1 баробар кўпдир. 2018—2020 йилларнинг худди шу даврида Ўзбекистон тарвуз экспорти ҳажми 3 минг тоннадан ошмаган.
Жорий мавсум бошидан буён бир ярим ой ичидаги экспорт ҳажми 2018—2020 йиллардаги кўрсаткичлардан камида 20 баробар кўп бўлди.
2022 йилнинг 1 июль ҳолатига кўра, тарвузни даладан жўнатиш нархлари нав, сифат ва мамлакат ҳудудига қараб, саралаш ҳамда транспортга юклаш харажатлари ҳисобга олинмаганда килограмига 500-1000 сўм оралиғида ўзгариб турибди.
Аввалроқ 2022 йилнинг июнь ойи ўрталарида Ўзбекистон рекорд даражада тарвуз экспорт қилаётгани ҳақида хабар берилган эди.
Изоҳ (0)