Sanksiyalar va jamoatchilik bosimi tufayli Rossiyaning IT-pudratchilarga qiziqish deyarli qolmadi. Ularning o‘rnini autsorsing markaziga aylanishni maqsad qilgan O‘zbekiston egallashi mumkin, deb yozadi Forbes.
Autsorsing — bu bir kompaniya ayrim funksiyalar yoki xizmatlarni boshqa kompaniyaga topshirishi. Autsorsing butun dunyoda juda keng tarqalgan, chunki bu xarajatlarni kamaytirishga yordam beradi. Masalan, ko‘plab Amerika kompaniyalari mijozlarni qo‘llab-quvvatlash xizmatlarini Hindistonga autsorsing qilgan.
Postsovet davlatlari orasida aholimiz eng tez o‘sib bormoqda, shuning uchun bizda inson kapitali bor, — deya tushuntiradi Axborot texnologiyalari va kommunikatsiyalarini rivojlantirish vaziri Sherzod Shermatov.
Uning so‘zlariga ko‘ra, so‘nggi 3,5 yil ichida English Speaking Nation va IT Nation kabi bir qancha davlat dasturlari ishga tushirildi. Ular barcha bitiruvchilarning ingliz tilida erkin so‘zlasha olishi va IT sohasida pul ishlashlarini ta’minlashga qaratilgan.
Iyun oyida Sherzod Shermatov yirik delegatsiya boshchiligida San-Fransiskoga tashrif buyurib, O‘zbekistonni Rossiya va Belarusga muqobil IT-autsorsing markaz sifatida taklif qilgan.
Vazir Ukrainada urush boshlanganidan keyin 6 mingga yaqin rossiyalik va belaruslik O‘zbekistonga ko‘chib kelganini ta’kidladi.
Masalan, EPAM Systems va Exadel minglab xodimlarini Minskdan Toshkentga IT-Park tomonidan tashkil etilgan reyslarda olib kelgan.
O‘tgan yili EPAM’da O‘zbekistonda 300 ga yaqin kishi ishlagan bo‘lsa, kelgusi yilda kompaniya xodimlari sonini 3000 kishiga yetkazishni rejalashtirmoqda, - deydi Shermatov.
Hozirda boshqa kompaniyalarni O‘zbekistonga rivojlanayotgan bozor sifatida qarashlari uchun ish olib borilmoqda.
Bu jarayonda yordam berayotganlardan biri RevoTech kompaniyasi asoschisi Nodir Ro‘zmatovdir. Uning kompaniyasi Nyu-Yorkda joylashgan, ammo Toshkentda 450 dan ortiq xodimi bor.
Bir marta bitta sug‘urta kompaniyasi bilan gaplashgan, ular hindistonlik sheriklaridan unchalik mamnun emasliklarini bildirgan. Men ularga autsorsingim joylashgan O‘zbekistonni taklif qildim. Amerikaliklar qiziqib qoldi, - deydi Ro‘zmatov.
O‘zbekiston 2028-yilga borib yillik IT eksportini 1 milliard dollarga yetkazishni rejalashtirmoqda. Taqqoslash uchun, 2022 yilda 100 million dollar prognoz qilinmoqda.
Agar bu amalga oshirilsa, IT oltin kabi qimmat eksportga aylanadi va kambag‘allikni kamaytirishga katta hissa qo‘shadi.
Forbes’ning fikricha, agar O‘zbekiston narx-navo nisbati bo‘yicha Filippin yoki Hindiston kabi yaxshi xizmatlarni taklif qila olsa, hozirgi barcha sa‘y-harakatlar o‘z samarasini beradi.
Avvalroq Sherzod Shermatov O‘zbekiston nima uchun chet el IT kompaniyalarini taklif qilishini tushuntirgan edi.
Izoh (0)