Andijon viloyatining Marhamat tumanida Ichki ishlar organlari yosh xodimlari va xizmatchilari, mahalla yoshlari o‘rtasida o‘tkazilgan “Zukko kitobxon” intellektual o‘yinining respublika bosqichi g‘oliblari aniqlandi. Bu haqda “Daryo”ga Yoshlar ishlari agentligi viloyat boshqarmasi axborot xizmati xabar berdi.
Ta’kidlanishicha, Prezidentning 2022-yil 19-yanvardagi “Mahallalarda yoshlar bilan ishlash tizimini tubdan takomillashtirish chora-tadbirlari to‘g‘risida” gi qarori ijrosini ta’minlash maqsadida 16-30 yoshdagi mahalla yoshlari o‘rtasida o‘tkazilgan tanlovning quyi bosqichlarida mahallalarda shakllantirilgan 36 ming 871 ta jamoa tarkibida 381 ming nafardan ziyod yoshlar qatnashib, o‘zlarining bilim, iqtidor va salohiyatini namoyish etgan.
Ichki ishlar organlari xodimlari o‘rtasida o‘tgan kitobxonlik bahslarining yakuniy natijalariga ko‘ra, barcha raqiblaridan yuqori ball to‘plagan Navoiy viloyati ichki ishlar tizimi yosh xodimlari g‘olib deb topilgan. Ikkinchi va uchinchi o‘rinlar esa Surxondaryo hamda Samarqand viloyatlari jamoalariga nasib etgan.
Mahalla yoshlari o‘rtasida esa birinchi o‘rinni Namangan viloyatining “Ibrat izdoshlari” jamoasi egallagan. Ikkinchi va uchinchi o‘rinlarni esa Toshkent shahrining “Xo‘ja uchqun” hamda Buxoro viloyatining “Mahmud Tarobiy” jamoalari qo‘lga kiritgan.
Tanlovning onlayn viktorinasida esa “Shum bola”, “Ulug‘bek xazinasi” va “Alkimyogar” jamoalari g‘olib deb topilgan.
Izoh (0)