“O‘zgidromet” yaqin kunlar uchun ob-havo prognozini e’lon qildi.
Unga ko‘ra, dam olish kunlari issiq yana ko‘tarila boshlaydi. Yakshanba kuniga kelib, harorat 38-41 darajagacha ko‘tariladi. 2—3-iyul kunlari janubiy hududlarning eng chekka qismida 43-45 darajagacha bo‘lgan harorat bilan juda issiq ob-havo saqlanib turadi.
Biroq bu issiq uzoq vaqt davom etmaydi. Keyingi haftaning boshidan esa respublika hududiga Volga bo‘yi hududlaridan salqin havo kirib keladi. Dushanba kunidan harorat asta-sekin pasayishni boshlaydi va haftaning aksariyat qismida 30-35 daraja atrofida, ba’zi joylarda 37-38 darajagacha bo‘ladi.
Respublika hududining katta qismida 1—3-iyul kunlari asosan kam bulutli ob-havo kuzatiladi, faqat Qoraqalpog‘istonda yakshanba kuni qisqa muddatli yomg‘ir yog‘ishi, momaqaldiroq bo‘lishi mumkin.
Respublika bo‘yicha ba’zi joylarda shamol 15-20 metr/sekundgacha kuchayishi, ba‘zi joylarda chang-to‘zonlari kuzatilishi mumkin. 3-iyulda shimolda va cho‘l hududlarda shamol 23-28 metr/sekundgacha kuchayishi mumkin.
1—3-iyulda Farg‘ona viloyatining tog‘ oldi va tog‘li hududlarida glyatsial (muz) sel-suv toqin hodisalari yuzaga kelishi mumkin.
Eslatib o‘tamiz, “O‘zgidromet” mutaxassisi Erkin Abdulahatov “Daryo” muxbiri bilan suhbatda havo harorati 4-iyuldan keyin 8-10 darajaga pasayishi kutilayotganini aytgandi. Iyul oyining ikkinchi va uchinchi o‘n yilliklarida harorat asosan 35–38 daraja atrofida bo‘lishi, ayrim kunlari ba’zi joylarda 40–42 darajagacha ko‘tarilishi kutilmoqda.
Izoh (0)