Андижон вилоятининг Марҳамат туманида Ички ишлар органлари ёш ходимлари ва хизматчилари, маҳалла ёшлари ўртасида ўтказилган «Зукко китобхон» интеллектуал ўйинининг республика босқичи ғолиблари аниқланди. Бу ҳақда «Дарё»га Ёшлар ишлари агентлиги вилоят бошқармаси ахборот хизмати хабар берди.
Таъкидланишича, Президентнинг 2022 йил 19 январдаги «Маҳаллаларда ёшлар билан ишлаш тизимини тубдан такомиллаштириш чора-тадбирлари тўғрисида» ги қарори ижросини таъминлаш мақсадида 16-30 ёшдаги маҳалла ёшлари ўртасида ўтказилган танловнинг қуйи босқичларида маҳаллаларда шакллантирилган 36 минг 871 та жамоа таркибида 381 минг нафардан зиёд ёшлар қатнашиб, ўзларининг билим, иқтидор ва салоҳиятини намойиш этган.
Ички ишлар органлари ходимлари ўртасида ўтган китобхонлик баҳсларининг якуний натижаларига кўра, барча рақибларидан юқори балл тўплаган Навоий вилояти ички ишлар тизими ёш ходимлари ғолиб деб топилган. Иккинчи ва учинчи ўринлар эса Сурхондарё ҳамда Самарқанд вилоятлари жамоаларига насиб этган.
Маҳалла ёшлари ўртасида эса биринчи ўринни Наманган вилоятининг «Ибрат издошлари» жамоаси эгаллаган. Иккинчи ва учинчи ўринларни эса Тошкент шаҳрининг «Хўжа учқун» ҳамда Бухоро вилоятининг «Маҳмуд Таробий» жамоалари қўлга киритган.
Танловнинг онлайн викторинасида эса «Шум бола», «Улуғбек хазинаси» ва «Алкимёгар» жамоалари ғолиб деб топилган.
Изоҳ (0)