Avstraliya Rossiyaga qarshi cheklov choralarini kengaytirdi, sanksiya ro‘yxatiga 16 nafar rossiyalik kiritildi, deb yozadi “RBK” mamlakat hukumati saytiga joylangan hujjatga tayanib.
Sanksiyaga uchraganlar orasida “Natsionalnaya Media Gruppa” xoldingi direktorlar kengashi raisi, olimpiya chempioni Alina Kabayeva, Rossiya prezidentining amakivachchasi, “Master bank” sobiq vitse-prezidenti Igor Putin, uning o‘g‘li Roman Putin, prezidentning jiyani, “SOGAZ straxovaniye” boshqaruv raisi o‘rinbosari Mixail Putin va boshqa bir qator idora va muassasalar rahbarlari bor.
Fevral oxiridan buyon Kanberra Rossiyaga qarshi sanksiyalar ro‘yxatini bir necha marta kengaytirgan edi, xususan, hukumat Rossiya oliy rahbariyati vakillarining Avstraliyaga tashrif buyurishini taqiqlab qo‘ygandi. Sanksiyalar, shu jumladan, Putin, tashqi ishlar vaziri Sergey Lavrov va mudofaa vaziri Sergey Shoyguga tegishli bo‘ldi. Aprel boshida esa Avstraliyada “Putinga yaqin elita vakillari va oligarxlar”ning bir qismiga qarshi sanksiyalar tasdiqlandi.
Rossiya Tashqi ishlar vazirligi aprel o‘rtalarida 228 nafar Avstraliya fuqarosiga, shu jumladan, bosh vazir Skott Morrison va uning o‘rinbosari Barnabi Joysga mamlakatga kirishni taqiqladi. Iyun o‘rtalarida esa cheklov choralari kengaytirildi.
Izoh (0)