Электр энергияси тақчиллиги шароитида Япония ҳукумати аҳолидан электр узилишининг олдини олиш учун кондиционерларни ўчиришни сўради, деб ёзмоқда Deutsche Welle.
Нашрнинг ёзишича, Японияда тўртинчи кун кетма-кет кучли жазирама кузатилган ва шаҳарликлар нажот излаб кондиционерларни ёқишган. Расмийлар электр энергияси истеъмолининг ортиши электр токи узилишига олиб келиши мумкинлигидан огоҳлантирди. Мамлакатда ҳаво ҳарорати Цельсий бўйича 36 даражага чиқиши прогноз қилинган.
Расмийлар дастлаб Токио аҳолисидан электр энергияси истеъмолини камайтиришни сўради. Бироқ жазирама баъзилар учун ҳалокатли бўлганидан кейин ҳукумат энергияни тежаш борасидаги амбицияларини пасайтирди.
Токиода жазирама туфайли касалхонага ётқизилганлар сони 76 нафарга етган, тез ёрдам хизмати хабарига кўра, камида икки киши жазирамадан вафот этган. Шу муносабат билан расмийлар Токио аҳолисидан энергияни меъёрида тежашни сўради.
«Одамлардан энергия тежашни сўраганимиз учун кондиционерларини ўчираётган кексалар ҳам бор. Лекин, илтимос, ҳозирги ҳавода иссиқ уришидан сақланиш учун кўпроқ сув ичишни унутманг», — дейди савдо ва саноат вазири Коити Хагиуда матбуот анжуманида.
Ҳукумат Токио ва унга яқин саккизта префектурада энергия таъминоти минимал даражага етиши мумкинлигидан огоҳлантирди. Агар захира қуввати энг қуйи чегарага етса, аҳоли электр таъминотида узилишларга дуч келиши мумкин.
Эслатиб ўтамиз, Япония 2018 йилда ҳам худди шундай иссиқлик тўлқинини бошидан кечирган эди. Ўшанда Токиода тарихда биринчи марта 40 даражадан юқори ҳарорат қайд этилган ва ҳароратнинг сакраши «табиий офат» деб эълон қилинди.
Мавзуга доир: Покистон ҳукумати аҳолидан чойни камроқ ичишни сўради
Изоҳ (0)