Turkiya Finlyandiya va Shvetsiyaning NATOga qo‘shilish haqidagi so‘rovini qo‘llab-quvvatlaydi, bu haqda Finlyandiya prezidenti matbuot xizmati ma’lum qildi, deb yozadi “RBK”.
Ta’kidlanishicha, Madridda Shimoliy Atlantika alyansining sammiti oldidan Finlyandiya va Turkiya prezidentlari Sauli Niinistyo va Rajab Toyyib Erdo‘g‘on hamda Shvetsiya bosh vaziri Magdalena Andersson ishtirokida uchrashuv bo‘lib o‘tgan.
“Ushbu uchrashuv yakunlariga ko‘ra, bizning tashqi ishlar vazirlarimiz Turkiya Madridda shu hafta bo‘lib o‘tadigan sammitda Finlyandiya va Shvetsiyaning NATO a’zoligiga taklif etilishini qo‘llab-quvvatlashini tasdiqlovchi uch tomonlama memorandumni imzoladi”, — deyiladi matbuot xizmati xabarida.
Qayd etilishicha, yaqin ikki kun ichida mamlakatlarning alyansga qo‘shilishi bo‘yicha aniq qadamlar kelishiladi, ammo endi bu qaror “muqarrardir”.
Qo‘shma memorandum uchala mamlakatning “bir-birining xavfsizligiga tahdid yuzaga kelgan taqdirda to‘liq qo‘llab-quvvatlash” qoidasiga sodiqligini ko‘rsatadi. “Finlyandiya terrorizmning har qanday shakli va ko‘rinishini qoralaydi. NATO a’zosi sifatida Finlyandiya tashkilotning terrorizmga qarshi kurash bo‘yicha hujjatlari va siyosatiga to‘liq rioya qiladi”, — deyiladi bayonotda.
NATO bosh kotibi Yens Stoltenberg uch tomonlama memorandum imzolanganini tasdiqladi hamda Finlyandiya va Shvetsiya Turkiya bilan uning xavfsizligini ta’minlash bo‘yicha kelishib olganini aytdi.
Uning so‘zlariga ko‘ra, 29-iyun, chorshanba kuni NATO mamlakatlari yetakchilari Shvetsiya va Finlyandiyani alyansga taklif qilish haqida qaror qabul qiladi.
Turkiya prezidenti matbuot xizmati, o‘z navbatida, ma’lum qilishicha, Finlyandiya va Shvetsiya terrorizmga qarshi kurash sohasidagi qonunchilikka tuzatishlar kiritadi.
Turkiya shu paytgacha Shvetsiya va Finlyandiyaning NATOga qo‘shilishiga to‘sqinlik qilib kelayotgan edi. Anqara ushbu mamlakatlardan o‘zi terrorchilik tashkiloti deb hisoblaydigan Kurdiston ishchilar partiyasi a’zolarining topshirilishini, u bilan bog‘liq baqrcha tashkilotlar yopilishini, shuningdek, bu borada kafolatlar berilishini talab qilgandi.
Stoltenberg Turkiyaning terrorizmning qo‘llab-quvvatlanishi borasidagi xavotirlarini o‘rinli deb atagandi.
Izoh (0)