Туркия Финляндия ва Швециянинг НАТОга қўшилишига розилик берди

Туркия Финляндия ва Швециянинг НАТОга қўшилиш ҳақидаги сўровини қўллаб-қувватлайди, бу ҳақда Финляндия президенти матбуот хизмати маълум қилди, деб ёзади «РБК».

Таъкидланишича, Мадридда Шимолий Атлантика альянсининг саммити олдидан Финляндия ва Туркия президентлари Саули Ниинистё ва Ражаб Тоййиб Эрдўғон ҳамда Швеция бош вазири Магдалена Андерссон иштирокида учрашув бўлиб ўтган.

«Ушбу учрашув якунларига кўра, бизнинг ташқи ишлар вазирларимиз Туркия Мадридда шу ҳафта бўлиб ўтадиган саммитда Финляндия ва Швециянинг НАТО аъзолигига таклиф этилишини қўллаб-қувватлашини тасдиқловчи уч томонлама меморандумни имзолади», — дейилади матбуот хизмати хабарида.

Қайд этилишича, яқин икки кун ичида мамлакатларнинг альянсга қўшилиши бўйича аниқ қадамлар келишилади, аммо энди бу қарор «муқаррардир».

Қўшма меморандум учала мамлакатнинг «бир-бирининг хавфсизлигига таҳдид юзага келган тақдирда тўлиқ қўллаб-қувватлаш» қоидасига содиқлигини кўрсатади. «Финляндия терроризмнинг ҳар қандай шакли ва кўринишини қоралайди. НАТО аъзоси сифатида Финляндия ташкилотнинг терроризмга қарши кураш бўйича ҳужжатлари ва сиёсатига тўлиқ риоя қилади», — дейилади баёнотда.

НАТО бош котиби Йенс Столтенберг уч томонлама меморандум имзоланганини тасдиқлади ҳамда Финляндия ва Швеция Туркия билан унинг хавфсизлигини таъминлаш бўйича келишиб олганини айтди.

Унинг сўзларига кўра, 29 июнь, чоршанба куни НАТО мамлакатлари етакчилари Швеция ва Финляндияни альянсга таклиф қилиш ҳақида қарор қабул қилади.

Туркия президенти матбуот хизмати, ўз навбатида, маълум қилишича, Финляндия ва Швеция терроризмга қарши кураш соҳасидаги қонунчиликка тузатишлар киритади.

Туркия шу пайтгача Швеция ва Финляндиянинг НАТОга қўшилишига тўсқинлик қилиб келаётган эди. Анқара ушбу мамлакатлардан ўзи террорчилик ташкилоти деб ҳисоблайдиган Курдистон ишчилар партияси аъзоларининг топширилишини, у билан боғлиқ бақрча ташкилотлар ёпилишини, шунингдек, бу борада кафолатлар берилишини талаб қилганди.

Столтенберг Туркиянинг терроризмнинг қўллаб-қувватланиши борасидаги хавотирларини ўринли деб атаганди.