Turkiya Finlyandiya va Shvetsiya bilan muzokaralar o‘tkazishdan bosh tortdi

Turkiya NATOning Shvetsiya va Finlyandiya bilan ularning alyansga kirishiga qarshi e’tirozlari bo‘yicha uch tomonlama muzokaralar o‘tkazish taklifini rad etdi, deb yozadi “RBK”.

Financial Times o‘z manbalariga tayanib xabar berishicha, NATO vositachiligidagi muzokaralar 15-iyunga rejalashtirilgan edi, biroq ular o‘tkazilmadi.

Anqara muzokaralarga rozilik berishidan avval Xelsinki va Stokgolmdan Kurdiston ishchilar partiyasi (KIP)ning faoliyati yuzasidan xavotirlar bo‘yicha “muayyan takliflar”ni talab qilmoqda. Turkiya prezidenti Rajab Toyyib Erdo‘g‘on 15-iyun, chorshanba kuni Shvetsiya va Finlyandiya terrorchilikka qarshi kurashda “aniq va qat’iy harakatlar”ni amalga oshirmagunicha, ularning alyansga a’zoligiga o‘z munosabatini o‘zgartirmasligini yana ma’lum qildi. Turkiya yetakchisi avval ham Shvetsiya va Finlyandiyani NATO bilan alyansga qo‘shilish bo‘yicha muzokaralarga vaqtini sarflamaslikka chaqirgan edi. Turkiyaning talablari o‘zgargani yo‘q va gaplashadigan hech narsa yo‘q, degan edi u.

Alyans bosh kotibi Yens Stoltenberg 13-iyun kuni Shvetsiyaga tashrifi chog‘ida Turkiya bilan munosabatlarni yo‘lga qo‘yish hamda Shvetsiya va Finlyandiyaning arizalari bo‘yicha tezroq progressga erishish uchun barcha tomonlar bilan yaqin muloqot davom ettirilayotganini aytgandi. Stoltenberg Stokgolmning muammoni, xususan, terrorchilikka qarshi kurashga nisbatan qonunchilikni o‘zgartirish yo‘li bilan hal qilishga tayyorligini ma’qulladi. U Turkiyaning xavotirlarini o‘rinli deb atadi. Bosh kotib masalani oqilona muddatlarda hal qilish mumkinligiga ishonch bildirdi. “Mening maqsadim shundan iboratki, Finlyandiya va Shvetsiya iloji boricha tezroq alyansga a’zo bo‘lishi kerak”, — dedi Stoltenberg.

Finlyandiya va Shvetsiya 18-may kuni NATOga kirish uchun ariza topshirgandi. Biroq Turkiya hozirda ushbu arizalarni ko‘rib chiqishga to‘sqinlik qilmoqda. Anqaraning Skandinaviya davlatlariga qarshi bir qancha da’volari bor: xususan, Turkiya Shvetsiya va Finlyandiyani Turkiyada terrorchi deb topilgan kurd guruhlarini qo‘llab-quvvatlashda ayblaydi.