Ijtimoiy tarmoqlarda Toshkent viloyatining Chinoz tumanidagi bug‘doy dalasi o‘rni yonayotgani tasvirlangan video tarqaldi. Viloyat Ekologiya boshqarmasi mazkur holatga munosabat bildirib, g‘alla dalasini yoqib yuborgan shaxs javobgarlikka tortilganini ma’lum qildi.
Ma’lum qilinishicha, internetda tarqalgan videodagi holat Toshkent viloyati Ekologiya va atrof-muhitni muhofaza qilish boshqarmasi va Chinoz tuman Ekologiya bo‘limi xodimlari tomonidan o‘rganilgan.
O‘rganish natijasida yong‘in bo‘lgan hudud Chinoz tumani hududidan o‘tuvchi M-39 avtomagistral yo‘li yoqasida A.Asrlanbayevga qarashli fermer xo‘jaligida g‘alladan bo‘shagan yer maydoni ekani va u fuqaro Z.Abdullayev tomonidan ijaraga olingani aniqlangan. Fuqaro takroriy ekin ekish maqsadida somon poyalari qoldiqlari yoqib yuborgan.
Ushbu holat bo‘yicha fuqaro Z.Abdullayevga nisbatan Ma’muriy javobgarlik to‘g‘risidagi kodeksning 88-moddasi (atmosfera havosini muhofaza qilish talablariga rioya qilmaslik) 3-qismiga asosan ma’muriy jazo chorasi qo‘llanilgan va tabiatga yetkazilgan zarar hisoblangan.
Avvalroq Namanganda g‘alladan bo‘shagan 27 gektar yerdagi somon yoqib yuborilgani to‘g‘risida xabar berilgandi.
Izoh (0)