Ижтимоий тармоқларда Тошкент вилоятининг Чиноз туманидаги буғдой даласи ўрни ёнаётгани тасвирланган видео тарқалди. Вилоят Экология бошқармаси мазкур ҳолатга муносабат билдириб, ғалла даласини ёқиб юборган шахс жавобгарликка тортилганини маълум қилди.
Маълум қилинишича, интернетда тарқалган видеодаги ҳолат Тошкент вилояти Экология ва атроф-муҳитни муҳофаза қилиш бошқармаси ва Чиноз туман Экология бўлими ходимлари томонидан ўрганилган.
Ўрганиш натижасида ёнғин бўлган ҳудуд Чиноз тумани ҳудудидан ўтувчи М-39 автомагистрал йўли ёқасида А.Асрланбаевга қарашли фермер хўжалигида ғалладан бўшаган ер майдони экани ва у фуқаро З.Абдуллаев томонидан ижарага олингани аниқланган. Фуқаро такрорий экин экиш мақсадида сомон поялари қолдиқлари ёқиб юборган.
Ушбу ҳолат бўйича фуқаро З.Абдуллаевга нисбатан Маъмурий жавобгарлик тўғрисидаги кодекснинг 88-моддаси (атмосфера ҳавосини муҳофаза қилиш талабларига риоя қилмаслик) 3-қисмига асосан маъмурий жазо чораси қўлланилган ва табиатга етказилган зарар ҳисобланган.
Аввалроқ Наманганда ғалладан бўшаган 27 гектар ердаги сомон ёқиб юборилгани тўғрисида хабар берилганди.
Изоҳ (0)