Британиянинг The Economist нашри озиқ-овқат ва ёнилғи қимматлашуви туфайли, яқин 12 ой ичида тартибсизликлар юзага келиши эҳтимоли катта бўлган тўққизта мамлакатни маълум қилди. Ижтимоий-сиёсий ўзгаришлар юз бериши учун даъвогар мамлакатлар орасига Марказий Осиёдаги бир йўла иккита давлат киритилди, булар Қирғизистон ва Туркманистондир.
Мақолада пандемия ва Россия-Украина ҳарбий низоси оқибатида дунёда юзага келган озиқ-овқат ва энергия хавфсизлиги билан боғлиқ муаммолар кўриб чиқилади.
Қирғизистон яқин бир йил мобайнида тартибсизликлар кутиладиган мамлакатлар рўйхатига киритилди. Прогноз даражасини экспертлар юқори деб баҳоламоқда.
Аҳолиси учун ўз ҳуқуқ ва эркинликларини талаб қилиш одатий иш бўлган Қирғизистондан ташқари, рўйхатга кутилмаганда Туркманистон киритилди, у ерда эса фуқаролар, одатда ҳаётнинг барча машаққатларига чидаб келади.
Шунингдек, ижтимоий-сиёсий инқироз Покистон, Туркия, Перу ва Африкадаги тўртта мамлакат — Миср, Тунис, Уганда, ЖАРда содир бўлиши мумкин.
Мақола муаллифи қайд этишича, Қирғизистонда давлат мустақиллигининг 30 йили давомида уч нафар президент ҳокимиятдан ағдарилган.
Катта қисми Россиядан етказиладиган озиқ-овқат ва ёнилғи нархининг ошиши тартибсизликларга олиб келиши мумкин, деб тахмин қилинмоқда.
Умуман олганда, Қирғизистоннинг Россияга кўп жиҳатдан боғлиқлиги қайд этилмоқда, шу жумладан, муҳожирлар ўз ватанига юборадиган пул ўтказмалари соҳасида ҳам.
Туркманистонга келганда, иқтисодий бошқарувнинг самарасизлиги туфайли, бу мамлакатда анчадан буён озиқ-овқат танқислиги кузатилаётгани, муайян чекловлар ўрнатилгани айтилди.
Таъкидланишича, агар, масалан, кимдир белгиланганидан кўра кўпроқ нон сотиб олган бўлса, 15 суткага қамалиши мумкин.
Бироқ мақола муаллифи туркман халқи жорий инқирозни итоаткорлик билан ўтказмаслигидан дарак берувчи ҳеч қандай факт ва далиллар келтирмади.
Изоҳ (0)