Birlashgan Millatlar Tashkiloti donorlarni Afg‘onistondagi zilziladan jabrlanganlarga zudlik bilan 110 million dollar yordam berishga chaqirdi. Bu haqda BMT saytiga tayanib, “Interfaks” xabar berdi.
So‘ralgan mablag‘ zilziladan eng ko‘p jabr ko‘rgan Paktika va Xost viloyatlaridagi 362 ming kishiga kelgusi uch oy davomida favqulodda yordam ko‘rsatish uchun mo‘ljallangan.
Qayd etilishicha, Afg‘onistondagi zilzila oqibatida turar joy binolari, tibbiyot muassasalari binolari va maktablar vayron bo‘lgan. Bundan tashqari, suv va elektr ta’minoti tizimlari ham shikastlangan.
“Yangi murojaat Afg‘onistonga gumanitar yordam rejasining ustuvor qismi bo‘lib, ushbu reja joriy yilda 4,4 milliard dollar ajratishni nazarda tutadi. Afsuski, reja atigi 34 foiz moliyalashtirildi”,— deyiladi hisobotda.
O‘tgan hafta BMTning Favqulodda vaziyatlar bo‘yicha gumanitar koordinatori Martin Griffits Favqulodda vaziyatlarda harakat qilish markaziy jamg‘armasidan Afg‘onistonga 10 million dollar ajratish qarorini e’lon qilgan edi.
Eslatib o‘tamiz, 22-iyunga o‘tar kechasi Afg‘onistonning janubi-sharqiy mintaqasida 6,1 magnitudali zilzila sodir bo‘ldi. Buning oqibatida 1,5 ming kishi halok bo‘lgan, 2 ming kishi jarohatlangan, minglab inshootlar vayron bo‘lgan.
Izoh (0)