Shotlandiya birinchi vaziri Nikola Sturjyon 28-iyun kuni, Shotlandiya mustaqilligi bo‘yicha maslahat referendumi 2023-yil 19-oktabrga belgilanganini ma’lum qildi, deya xabar beradi Britaniya matbuoti.
Referendumga qo‘yilgan savol 2014-yildagi savol bilan bir xil bo‘ladi: “Shotlandiya mustaqil davlat bo‘lishi kerakmi?”.
Britaniya OAVlari maslahat referendumi oddiy referendum kabi kuchga ega emasligini, bu ovozga qo‘yilgan masala bo‘yicha keyingi siyosiy yoki qonunchilik qarorlarini qabul qilish mumkin bo‘lgan birinchi qadam ekanligini ta’kidlamoqda.
Demak, agar Shotlandiya aholisining aksariyati mustaqillik uchun ovoz bersa, bu Shotlandiya darhol mustaqil davlatga aylanadi degani emas. Bunda referendumdan keyin tegishli qonun loyihasi Buyuk Britaniya va Shotlandiya parlamentlariga kiritiladi.
Sterdjen Britaniya hukumati bilan referendum o‘tkazish muddati va shartlari bo‘yicha muzokaralarni boshlashni “xohlashini va bunga tayyor” ekanini aytdi. U seshanba kuni kechroq Britaniya Bosh vaziri Boris Jonsonga maktub yozishni rejalashtirayotganini, unda u yangi referendum o‘tkazish masalasini ko‘tarishini qo‘shimcha qildi.
2014-yilda Shotlandiyada mustaqillik bo‘yicha referendum o‘tkazilgandi. O‘shanda shotlandlarning 55 foizdan ko‘prog‘i Buyuk Britaniya tarkibida qolish uchun ovoz bergan edi. Sterdjen avvalroq yangi referendum o‘tkazish zarurligini ta’kidladi. U buni, xususan, Buyuk Britaniyaning Yevroittifoqni tark etgani va shuning uchun shotlandlar endi bu vaziyatda Birlashgan Qirollik tarkibida qolish-qolmasligini hal qilishlari kerakligi bilan izohladi.
Izoh (0)