Шотландия биринчи вазири Никола Стуржён 28 июнь куни, Шотландия мустақиллиги бўйича маслаҳат референдуми 2023 йил 19 октябрга белгиланганини маълум қилди, дея хабар беради Британия матбуоти.
Референдумга қўйилган савол 2014 йилдаги савол билан бир хил бўлади: «Шотландия мустақил давлат бўлиши керакми?».
Британия ОАВлари маслаҳат референдуми оддий референдум каби кучга эга эмаслигини, бу овозга қўйилган масала бўйича кейинги сиёсий ёки қонунчилик қарорларини қабул қилиш мумкин бўлган биринчи қадам эканлигини таъкидламоқда.
Демак, агар Шотландия аҳолисининг аксарияти мустақиллик учун овоз берса, бу Шотландия дарҳол мустақил давлатга айланади дегани эмас. Бунда референдумдан кейин тегишли қонун лойиҳаси Буюк Британия ва Шотландия парламентларига киритилади.
Стерджен Британия ҳукумати билан референдум ўтказиш муддати ва шартлари бўйича музокараларни бошлашни «хоҳлашини ва бунга тайёр» эканини айтди. У сешанба куни кечроқ Британия Бош вазири Борис Жонсонга мактуб ёзишни режалаштираётганини, унда у янги референдум ўтказиш масаласини кўтаришини қўшимча қилди.
2014 йилда Шотландияда мустақиллик бўйича референдум ўтказилганди. Ўшанда шотландларнинг 55 фоиздан кўпроғи Буюк Британия таркибида қолиш учун овоз берган эди. Стерджен аввалроқ янги референдум ўтказиш зарурлигини таъкидлади. У буни, хусусан, Буюк Британиянинг Евроиттифоқни тарк этгани ва шунинг учун шотландлар энди бу вазиятда Бирлашган Қироллик таркибида қолиш-қолмаслигини ҳал қилишлари кераклиги билан изоҳлади.
Изоҳ (0)