Ukraina harbiy asirlar bilan shug‘ullanish bo‘yicha idoralararo muvofiqlashtiruvchi shtab 17 nafar ukrainalik harbiy asirni 15 nafar rossiyalikka almashtirdi, deya xabar berdi Ukraina Mudofaa vazirligining Bosh razvedka boshqarmasi (BRB).
“16 nafar ukrainalik harbiy xizmatchi, jumladan, ikki ofitser va 14 askar vatanga qaytmoqda. Shuningdek, bir nafar fuqaro ham ozod qilindi”, — degan BRB.
Idora ma’lumotlariga ko‘ra, besh nafar harbiy xizmatchi og‘ir yaralangan va shoshilinch davolanishga muhtoj.
“Ukrayinska pravda”ning almashish vaqtida o‘sha yerda bo‘lgan muxbirga tayanib xabar berishicha, harbiylarning bir qismi ikki oy avval asirga olingan. Nashrning yozishicha, ozod etilganlar orasida dengiz piyodalari, piyoda askarlar va desantchilar bor.
Gazeta muxbirining aniqlik kiritishicha, asirlikda besh nafar yarador ukrainalik Rossiya kasalxonalarida, shu jumladan Qrimda ham bo‘lgan.
Ayirboshlash Xerson (to‘liq Rossiya armiyasi nazorati ostida) va Nikolayev viloyati chegarasida bo‘lib o‘tgan.
Izoh (0)