Xarkov, Kremenchug va Slavyanskda o‘nlab qurbonlar, yuzlab yaradorlar. Urushning 124-kunidan fotoreportaj
27-iyun kuni Rossiya qo‘shinlari Poltava viloyatining Kremenchuk shahridagi savdo markaziga hujum qildi, prezident Vladimir Zelenskiy u yerda mingdan ortiq tinch aholi bo‘lganini aytdi: 18 kishi halok bo‘ldi, 59 kishi yaralandi, 40 ga yaqin kishi bedarak yo‘qoldi. Rossiya Lisichansk va uning atrofini o‘qqa tutishda davom etmoqda, hujum oqibatida ikki cherkov, turar joy binolari va infratuzilma obyektlari zarar ko‘rdi, deydi Lugansk viloyati rahbari Sergey Gayday. Ukraina Rossiya bilan yadroviy xavfsizlik sohasida ikki kelishuvni bekor qildi. Severodonetskdagi “Azot” zavodi hududi LXR va Rossiyaning to‘liq nazoratiga o‘tdi, dedi Rossiya tomoni. Rossiya Mudofaa vazirligi 26-iyun kuni Kiyevning Shevchenkovskiy tumaniga berilgan zarbalarni tan oldi va turar joy binosining vayron bo‘lishida Ukraina havo hujumidan mudofaa kuchlarini aybladi. Xarkovning o‘qqa tutilishi oqibatida esa besh kishi halok bo‘ldi, yana 31 kishi yaralandi. Meduza urushning 124-kunidan asosiy fotosuratlarni taqdim etdi.
Mariupol
Mariupolda “Yagona Rossiya”dan yuborilgan gumanitar yordam tarqatilmoqda. 26-iyun kuni shahar meri maslahatchisi Pyotr Andryushchenko Mariupolning Levoberejniy tumanidagi vayron bo‘lgan uylardan birida o‘qqa tutilib halok bo‘lganlarning 100 dan ortiq jasadi topilganini ma’lum qildi.Foto: “TASS”
Odessa viloyati
Rossiya aviazarbasidan vayron bo‘lgan Mayaki posyolkasidagi turar joylar. Mahalliy hokimiyat ma’lumotlariga ko‘ra, Odessa viloyatidagi portlashda olti kishi, jumladan, bir bola jarohatlangan.Foto: Reuters
Mayakida Rossiya aviatsiyasi vayron qilgan uy ayvonidagi bola.Foto: Reuters
Donbass shimoli
“Vostok SOS” tashkiloti ko‘ngillilari evakuatsiya paytida bahmutlik 81 yoshli qariyaga yordam bermoqda. Shahar Lisichanskdan 57 kilometr uzoqlikda joylashgan. Amerika urushni o‘rganish instituti hisobotiga ko‘ra, rus qo‘shinlari Lisichanskning janubiy chekkasida yurishni davom ettirmoqda.Foto: Reuters
Politsiya xodimlari Slavyanskda Rossiya o‘qlari ostida halok bo‘lgan erkakning jasadini mashinadan chiqarib olmoqda. 27-iyun kuni ertalab Slavyansk markazidagi turar joylar o‘qqa tutildi. Donetsk viloyati harbiy ma’muriyati rahbari Pavel Kirilenkoning ma’lum qilishicha, bir kishi halok bo‘lgan, yana bir fuqaro yaralangan.Foto: AP Photo
Politsiya xodimi va feldsher Slavyanskda Rossiya aviazarbalaridan yaralangan ayolga birinchi yordam ko‘rsatmoqda. Ukraina Qurolli Kuchlari Bosh shtabining kechki hisobotiga ko‘ra, Slavyansk yo‘nalishida rus bo‘linmalari Barvenkovo va Slavyanskga hujum qilish uchun qulay sharoit yaratishga urinmoqda. Rossiya qurolli kuchlari shuningdek, Dolgenkiydan Mazanovkaga hujum qildi, biroq ularga qarshilik ko‘rsatildi.Foto: AP Photo
Xarkov
Maktab hovlisida raketa hujumidan keyin hosil bo‘lgan o‘ra. 27-iyun kuni rus qo‘shinlari Severnaya Saltovka hududini, Kiyev va Xarkovskiy tumanlarini, shuningdek, shahar chekkalarini o‘qqa tutdi. Ukraina matbuotiga ko‘ra, kamida besh kishi halok bo‘lgan, 22 kishi jumladan besh nafar bola yaralangan.Foto: AFP
Xarkovning turar joy mavzelariga qilingan hujum oqibatida halok bo‘lgan erkakning jasadi.Foto: Reuters
84 yoshli Anna Satanovskaya o‘qqa uchib halok bo‘lgan turmush o‘rtog‘iga motam tutmoqda.Foto: Reuters
Liliya raketa parchasidan jarohatlanib, vafot etgan odamning jasadi yotgan skameykadagi qonni artmoqda.Foto: Reuters
Kremenchug
Rossiya harbiylari tomonidan hujumga uchragan “Amstor” savdo markazida yong‘in sodir bo‘ldi. Poltava viloyati rasmiylariga ko‘ra, unda mingdan ortiq tinch aholi bo‘lgan. O‘n uch kishi halok bo‘ldi. Tibbiy yordam so‘rab 59 nafar fuqaro murojaat qilgan, ulardan deyarli yarmining ahvoli og‘ir. 40 kishi bedarak yo‘qolganlar ro‘yxatida.Foto: Ukraina FVX
Rossiya qo‘shinlari tomonidan zarba berilgan savdo markazi o‘rnida qutqaruvchilar va harbiylar ishlamoqda.Foto: Reuters
Savdo markaziga raketa hujumi oqibatida yaralangan juftlik.Foto: Reuters
Izoh (0)