Ijtimoiy tarmoqlarda havo harorati +60 darajani ko‘rsatayotgan avtomobil termometri aks etgan suratlar tarqaldi. O‘zgidromet bunday harorat ko‘rsatgichlarga avtomobil korpusi va quyosh nurlari bilan isitilgan asfalt sabab bo‘lgani ma’lum qildi.
“Hozirgi kunda aholi havo haroratini aniqlash uchun maishiy termometrlardan keng foydalanmoqda. Ko‘pincha, bu asboblarning qabul qismi to‘g‘ridan-to‘g‘ri quyosh nurlaridan yoki atrofdagi jismlarning issiqlik nurlanishidan himoyalanmagan. Bunday holda termometr havo haroratini emas, balki termometr qabul qiluvchi qismining isish haroratni o‘lchaydi.
Quyosh nurlari ostida bo‘lgan inson, havo haroratini emas, balki tanasini to‘g‘ridan-to‘g‘ri quyosh nurlari va atrofdagi jismlardan chiqayotgan issiqlik nurlanishi bilan isishi haroratini sezadi.
Daraxtlar soyasida va baland binoning beton devori soyasida turgan inson haroratni boshqacha his etadi, chunki devorning issiqlik nurlanishi ostida bo‘lishi harorat his etish darajasini oshiradi”, – deyiladi xabarda.
Mutaxassislarning qayd etishicha, avtomobil ichida bo‘lgan inson avtomobil korpusi quyosh nurlari va qizigan asfaltdan issiqlik nurlanishini his etadi. Shuning uchun avtomobildagi o‘lchash asboblari +60 daraja va undan yuqori haroratni ko‘rsatishi mumkin.
Issiqlik nurlanish omillarining ta’sirini istisno qilish, va butun dunyoda amalga oshirilgan meteorologik o‘lchovlarni bir biriga taqqoslash jarayonini osonlashtirish maqsadida, kuzatuvlar, Jahon meteorologiya tashkiloti qoidalariga muvofiq, bir xil metodologiya va bir xil standart sharoitlarda amalga oshiriladi.
Ta’kidlanishicha, O‘zbekistonda meteorologik kuzatishlarning barcha yillari uchun eng yuqori harorat (+48…+49 darajadan) Qizilqum cho‘lida (1983-yil iyul oyida) va Termiz shahri hududida (1941-yil iyun-iyul oylarida) qayd etilgan.
Toshkentda absolyut harorat maksimumi +44,6 darajani tashkil etadi. Ushbu harorat 1997-yil 18-iyul kuni qayd etilgan.
Izoh (0)