Леонид Федун 26 йиллик фаолиятидан кейин «Лукойл»ни тарк этди. Аввал компания асосчиси Вагит Алекперов кетганини эълон қилганди

Леонид Федун нафақа ёшига етгани ва оилавий шароити туфайли «Лукойл» вице-президентлигини тарк этди. Бу ҳақда компания матбуот хизмати хабар берган.

«Лукойл» президенти Вадим Воробёв Федунни компания тарихидаги энг асосий инсонлардан бири деб эътироф қилди.

«У соҳадаги бир қатор муҳим воқеа-ҳодисаларни олдиндан кўра олган ва бу стратегик ҳужжатларда ўз аксини топган», — дея Воробёв сўзларидан иқтибос келтирган матбуот хизмати.

Федун 1996 йилдан бери «Лукойл» вице-президенти лавозимида ишлаб келаётганди. Унинг ўзи «РБК» нашрига лавозимдан кетгач компания акциядори бўлиб қолишини айтган. Федун ва унинг оиласи «Лукойл»нинг 9,3 фоизлик акция улушига эгалик қилади.

Шунингдек, Леонид Федун «Спартак» футбол клуби эгаларидан бири ҳисобланади. Тадбиркор «Лукойл»дан кетиши клуб ишларига таъсир кўрсатмаслигини таъкидлаган.

Федун ва унинг оила аъзолари Forbes талқинига кўра Россиянинг энг бой инсонлари ўттизлик рўйхатига кирган. 2021 йил якунлари бўйича журнал оиланинг бойлигини 5 миллиард долларга баҳолаган (Украинада уруш бошланганидан кейин ОАВда «Лукойл» акциялари нархи тушгани ҳақида хабарлар тарқалган ва бу Федунлар оиласи капиталига таъсир кўрсатган).

Апрель охирида «Лукойл» асосчиси ва 1993 йилдан буён унга раҳбарлик қилиб келган Вагит Алекперов компаниядан кетганини эълон қилган. У ўзига қарши эълон қилинган санкциялар «Лукойл»нинг тараққиётига салбий таъсир кўрсатишини истамаслигини баён этган.

Май охирида Вадим Воробёв «Лукойл»нинг янги президентлигига тайинланди, у асосий раҳбар курсисини эгаллагунига қадар 4 йил давомида компаниянинг биринчи вице-президенти сифатида ишлаган.