Farg‘ona viloyati Beshariq tumanida folbin fuqaroni aldab, moddiy boyliklarini tortib olgani aniqlandi. Bu haqda viloyat Ichki ishlar boshqarmasi xabar qildi.
Qayd etilishicha, M.N. ismli ayol IIBga murojaat qilib, unda noma’lum shaxs uning yashash xonadoniga kelib, unga tez kunda nabirali bo‘lishini aytgan. U folbinlik amallari bilan uning ishonchiga kirib, umumiy narxi 4,5 million so‘mlik tilla taqinchoqlari va 50 ming so‘m pulini firibgarlik yo‘li bilan qo‘lga kiritgan.
Holat yuzasidan Beshariq tuman IIB huzuridagi tergov bo‘limi tomonidan Jinoyat kodeksining 168-moddasi (firibgarlik) 2-qismi bilan jinoyat ishi qo‘zg‘atilgan.
Olib borilgan tezkor qidiruv harakatlari davomida ushbu jinoyatni Qashqadaryo viloyati Shahrisabz tumanida yashovchi S.Ch. sodir etgani aniqlanib, protsessual tartibda ushlangan.
Yuqorida ko‘rsatilgan jinoyatni sodir etgan shaxs uch yilgacha ozodlikdan mahrum qilish bilan jazolanishi mumkin.
Izoh (0)