“Yuventus” va Anxel di Mariya kelishuvga erishdi

Yarim himoyachi Anxel di Mariya “Yuventus” futbolchisiga aylanadi.

Goal nashriga ko‘ra, argentinalik yarim himoyachi Turin klubi taklifini qabul qilgan. Tomonlar bir yillik shartnoma imzolaydi. Hozirda tomonlar so‘nggi tafsilotlar va byurokratik masalalarni hal qilmoqda.

Avvalroq ham tomonlarning muzokaralar olib borayotgani haqida xabarlar tarqalgandi. Biroq o‘shanda futbolchiga “Barselona” ham asosiy da’vogarlardan biri bo‘lib turgandi va Anxel bir qarorga kela olmayotgandi.

Ushbu yozda “PSJ”ni erkin agent sifatida tark etgan di Mariya 2022-yilgi Jahon Chempionatida o‘ynash uchun yana bir mavsum Yevropada o‘tkazishni va keyin Argentinaga qaytishni rejalashtirmoqda.

Ma’lumot uchun, 34 yoshli futbolchi 2021/22-yilgi mavsumda barcha musobaqalar doirasida 31 o‘yin o‘tkazib, 5 ta gol va 8 ta golga assistentlik qildi.