Taekvondo bo‘yicha O‘zbekiston terma jamoasi Osiyo chempionatida tarixiy natija qayd etdi

Janubiy Koreyada taekvondo WT bo‘yicha XXV Osiyo chempionati o‘z yakuniga yetdi.

27-iyun kungi bahslarda -80 kg vazn toifasida ishtirok etgan o‘zbekistonlik Shuhrat Salayev qit’a chempionligini qo‘lga kiritdi.

Salayev finalda Tokio—2020 Olimpiadasi kumush medal sohibi iordaniyalik Solih ash-Sharabati bilan to‘qnash keldi va raqibini mag‘lub etdi.

Salayevdan tashqari Ulug‘bek Rashidov, Jasurbek Jaysunov va Nikita Rafalovich ham oltin medalni qo‘lga kiritgandi. Shu tariqa O‘zbekiston terma jamoasi mazkur qit’a birinchiligini 4 ta oltin, 1 ta kumush va 2 ta bronza medali bilan yakunladi. Ahamiyatli tomoni, erkaklar terma jamoasi 4 ta oltin medal bilan musobaqa mezbonlarini ortda qoldirib, umumjamoa hisobida birinchi o‘rinni egalladi. Qayd etish kerak, O‘zbekiston Osiyi chempionatida ilk bor 4 ta oltin medal qo‘lga kiritdi.

Shuningdek, terma jamoa a’zolari turli nominatsiyalarda g‘olib deb topildi. Jasurbek Jaysunov “Eng yaxshi sportchi”, O‘zbekiston terma jamoasi ustozi Pavel Xan “Eng yaxshi murabbiy”, O‘zbekiston terma jamoasi esa “Eng yaxshi jamoa” nominatsiyalari sohibiga aylandi.