Колумбиянинг Эспиналь шаҳрида томошабинлар ўтирган трибуна қулаб тушиши оқибатида беш киши ҳалок бўлди, 200 дан ортиқ одам жабрланди, деб ёзади «РБК».
Ҳодиса авлиё Пётр байрами муносабати билан ўтказилган энсьерро (буқалардан қочиш ўйини) чоғида юз берган. Оқибатда буқа аренадан қочиб чиқиб кетган, шаҳарда сариқ даражали тревога эълон қилинган.
Жабрланганлар ҳақида расмий маълумотлар ҳозирча йўқ, тез ёрдам 200 дан зиёд киши шикастлангани ҳақида хабар бермоқда.
Воқеа жойига қутқарувчилар келиб, жабрланганларга трибуна вайроналари остидан чиқишга ёрдамлашмоқда.
Ҳукумат тўрт кишининг ўлимини тасдиқлади, улар орасида уч ёшли бола ҳам бор. Қурбонларнинг шахслари ошкор этилганича йўқ. Камида саккизта трибуна қулаб тушган.
Провинция фуқаролар мудофааси директори майор Луис Фернандо Велес беш киши ҳалок бўлгани ҳақидаги маълумотни тасдиқлади ва 70 га яқин одам жабрланганини айтди. Унинг сўзларига кўра, вайроналар остида ҳеч ким қолмаган, бедарак йўқолган деб ҳисобланган бир неча киши топилган. У фавқулодда вазият бартараф этилганини маълум қилди.
Колумбиянинг сайланган президенти Густаво Петро фожиадан кейин буқалар жангини тақиқлашни таклиф қилди.
«Биз шунга ўхшаш ҳолатга Синселехода ҳам гувоҳ бўлган эдик. Шаҳарлар раҳбариятларидан одамлар ва ҳайвонлар ўлимини келтириб чиқараётган тадбирларни ўтказишга рухсат бермасликни сўрайман», — деб ёзди у Twitter’да.
Эслатиб ўтамиз, март ойида Ҳиндистондаги футбол ўйинида мухлислар ўтирган стадион трибунаси қулаб тушиб, ҳодиса оқибатида 200 дан ортиқ киши жабрланган эди.
2021 йилда эса Исроилдаги синагогада трибуна қулаши оқибатида 2 киши ҳалок бўлиб, 200 дан ортиқ одам жабрланган эди.
Изоҳ (0)