Inson va davlat organlari o‘rtasida yuzaga keladigan qarama-qarshiliklar va noaniqliklar inson foydasiga talqin qilinishi belgilab qo‘yilmoqda.
Bu haqda 25-iyun kuni jamoatchilik muhokamasiga qo‘yilgan “Konstitutsiyaga o‘zgartishlar kiritish to‘g‘risidagi qonun” loyihasida e’lon qilindi.
Unga ko‘ra, Konstitutsiyaning 13-moddasi quyidagicha ko‘rinish olishi ko‘zda tutilgan:
“Insonning davlat organlari bilan o‘zaro munosabatlarida qonunchilikda yuzaga keladigan, bartaraf etib bo‘lmaydigan barcha qarama-qarshiliklar va noaniqliklar inson foydasiga talqin qilinadi”.
O‘zbekiston Respublikasi Prezidentining 2020-yil 22-iyundagi farmoni bilan tasdiqlangan Inson huquqlari bo‘yicha O‘zbekiston Respublikasining Milliy strategiyasida belgilangan “Inson manfaatlari hamma narsadan ustun” degan tamoyil ushbu normaning shakllanishiga bevosita ta’sir ko‘rsatdi.
Shu bilan birga, 2022-yil 20-iyunda O‘zbekiston Respublikasi prezidenti Shavkat Mirziyoyev tomonidan konstitutsiyaviy komissiya a’zolari bilan uchrashuvda Yangi O‘zbekiston uchun inson qadri va xalq manfaati hamma narsadan ustunligi tamoyilini yangilanayotgan Konstitutsiyada aniq ifoda etish zarurligi taklif etildi.
Huquqiy davlatda barcha munosabatlar aniq qoidalar bilan tartibga solingan bo‘lishi kerak. Hech bir munosabat huquqiy yechimsiz qolmasligi shart. Ammo ijtimoiy munosabatlar juda keng. Hayotda shunday vaziyatlar yoki holatlar vujudga kelishi mumkinki, davlat va inson o‘rtasidagi ayrim munosabatlarning yechimi qonunchilikda ko‘rsatilmagan yoki noaniqliklarga sabab bo‘lishi aniq. Mana shunday holatlarda muammo kimning foydasiga va qanday tartibda hal etilishi muhim ahamiyat kasb etadi.
Shu nuqtayi nazardan olib qaraladigan bo‘lsa, kiritilayotgan mazkur o‘zgarish inson huquqlarini oliy qadriyat sifatida e’zozlanishiga yanada kuchliroq asos bo‘ladi.
Izoh (0)