UzVC Milliy venchur fondi Sturgeon Capital kompaniyasi bilan hamkorlikda o‘zining ilk startapini 100 ming dollar miqdorida moliyalashtirdi. Bu haqda Innovatsion rivojlanish vazirligi xabar bermoqda.
UzVC O‘zbekiston hukumatning qarori bilan 2020-yilda tashkil etilgan. Fondning boshlang‘ich ustav kapitali 15 milliard so‘m miqdorida belgilangan.
Xabar berilishicha, TASS Vision startapi taqdim etilgan arizalar orasida investitsiya komissiyasi tomonidan ma’qullangan.
Ushbu raundda mahalliy “biznes angeli” Bahrom Abduqodirov ham ishtirok etdi.
Mablag‘lar mahsulotni rivojlantirish va xizmat ko‘rsatish sifatini oshirish, shuningdek, tashqi bozorga chiqarishga yo‘naltiriladi.
2019-yilda tashkil etilgan TASS Vision startapi sun’iy intellektdan foydalangan holda videotahlil texnologiyasini taqdim etadi.
Bunga Visitor Analytics — jinsi va yoshi bo‘yicha tashrif buyuruvchilar tahlili, Face HR – HR vazifalarini osonlashtirish uchun xodimlarning kelish vaqtini qayd etish va (CJM) Customer Journey Map — do‘konda eng ko‘p “sotiladigan” nuqtalar tahlili kiradi.
Startap o‘zining asosiy missiyasini an’anaviy chakana savdoni yuqori texnologiyali va samarali savdoga aylantirish deb ataydi.
Ayni paytda startapda 20 dan ortiq xodimlar hamda Janubiy Koreya va Xitoydan masofaviy tarzda dasturchilar ishlamoqda.
UzVC ilgari yuborilgan arizalarni ko‘rib chiqish va startaplardan yangi arizalarni qabul qilishda davom etmoqda.
Izoh (0)