Инсон ҳуқуқлари олий қадрият сифатида эъзозланишига янада кучлироқ асос яратилмоқда

Инсон ва давлат органлари ўртасида юзага келадиган қарама-қаршиликлар ва ноаниқликлар инсон фойдасига талқин қилиниши белгилаб қўйилмоқда.

Бу ҳақда 25 июнь куни жамоатчилик муҳокамасига қўйилган «Конституцияга ўзгартишлар киритиш тўғрисидаги қонун» лойиҳасида эълон қилинди.

Унга кўра, Конституциянинг 13-моддаси қуйидагича кўриниш олиши кўзда тутилган:

«Инсоннинг давлат органлари билан ўзаро муносабатларида қонунчиликда юзага келадиган, бартараф этиб бўлмайдиган барча қарама-қаршиликлар ва ноаниқликлар инсон фойдасига талқин қилинади».

Ўзбекистон Республикаси Президентининг 2020 йил 22 июндаги фармони билан тасдиқланган Инсон ҳуқуқлари бўйича Ўзбекистон Республикасининг Миллий стратегиясида белгиланган «Инсон манфаатлари ҳамма нарсадан устун» деган тамойил ушбу норманинг шаклланишига бевосита таъсир кўрсатди.

Шу билан бирга, 2022 йил 20 июнда Ўзбекистон Республикаси президенти Шавкат Мирзиёев томонидан конституциявий комиссия аъзолари билан учрашувда Янги Ўзбекистон учун инсон қадри ва халқ манфаати ҳамма нарсадан устунлиги тамойилини янгиланаётган Конституцияда аниқ ифода этиш зарурлиги таклиф этилди.

Ҳуқуқий давлатда барча муносабатлар аниқ қоидалар билан тартибга солинган бўлиши керак. Ҳеч бир муносабат ҳуқуқий ечимсиз қолмаслиги шарт. Аммо ижтимоий муносабатлар жуда кенг. Ҳаётда шундай вазиятлар ёки ҳолатлар вужудга келиши мумкинки, давлат ва инсон ўртасидаги айрим муносабатларнинг ечими қонунчиликда кўрсатилмаган ёки ноаниқликларга сабаб бўлиши аниқ. Мана шундай ҳолатларда муаммо кимнинг фойдасига ва қандай тартибда ҳал этилиши муҳим аҳамият касб этади.

Шу нуқтаи назардан олиб қараладиган бўлса, киритилаётган мазкур ўзгариш инсон ҳуқуқларини олий қадрият сифатида эъзозланишига янада кучлироқ асос бўлади.