Sog‘liqni saqlash vazirligi tomonidan Qashqadaryo viloyatining G‘uzor tumaniga yuborilgan ishchi guruh tarkibida ekani aytilgan shifokorlar bu yolg‘on ekanini aytmoqda. Bu haqda “Daryo” muxbiri bilan suhbatlashgan shifokor Dilrabo Abdullayeva ma’lum qildi.
Suhbatdoshning ma’lumot berishicha, Toshkentdan yuborilgan ishchi guruh hududga yetib borgunga qadar G‘uzorda bo‘lib turish ularga yuklatilgan vazifa.“Men bir oydan beri Qashqadaryodaman. Bolalar o‘limiga sabab bo‘layotgan omillarni o‘rganish uchun hududga avvalroq yuborilganmiz. Kecha soat 16:30 da Toshkentga qaytib ketishim kerak edi, hatto biletlarim ham tayyor edi. Ammo erta tongdan telefon qilishib, ‘barcha ishingni tashla va G‘uzorga yetib bor’, deyishdi. Topshiriqqa ko‘ra, yonimdagi shifokor bilan G‘uzorga bordik. Qo‘limizdan kelganicha bolalarga yordam qildik. Keyin bolalarni Qarshi shahriga olib borishlari kerakligi haqida aytdim va Qarshiga o‘zim ham yetib bordim. Qarshida ularni tibbiy ko‘rikdan o‘tkazdik. Bolalarni olib kelgan yaqini bizga rahmat aytib, minnatdorlik izhor qildi”, — deydi Dilrabo Abdullayeva.
Dilrabo Abdullayeva “Daryo”da e’lon qilingan maqolaga e’tiroz bildirib, ishchi guruh tarkibida bo‘lmasa ham G‘uzorga borgani va bolalarga ko‘maklashishga harakat qilganini aytib, “bu maqola xizmat ustiga tuhmat bo‘ldi”, deydi.
Shifokor Toshkentdan yuborilgan ishchi guruh kecha, 24-iyun kuni soat 19:00 da Qashqadaryoga yetib kelganini aytdi. Keyinchalik bu fikrini o‘zgartirib, adashayotgan bo‘lishi mumkinligini, imkoni bo‘lsa uning barcha aytgan gaplarini esdan chiqarishimiz kerakligini bildirdi. E’lon qilingan maqolaga ham hech qanday e’tirozi yo‘qligini aytdi.
“Mayli, aybdor kerak bo‘lsa, men aybdorligimcha qolay. Siz vaziyatni yana surishtirib, vazirlikni ayblamang. Hech qanday e’tirozim yo‘q. Hammasi o‘z holicha qolsin”, — deydi Dilrabo Abdullayeva.
Ayni paytda Qashqadaryoda bo‘lib turgan shifokor uning fikrlari o‘zgarishiga bosim sabab bo‘lgan bo‘lishi mumkinligi haqidagi taxminni rad etmoqda.
“Daryo” vazirlikning G‘uzorga yetib borishi kerak bo‘lgan maxsus ishchi guruhi nechchi kishidan iboratligi va hududga qachon yetib borgani, shuningdek, Dilrabo Abdullayeva hamda Muborak Alixo‘jayevalar ishchi guruh tarkibida bor yoki yo‘qligiga aniqlik kiritishga urindi. Biroq vazirlik axborot xizmati Furqat Sanayev barcha savollarni ochiq qoldirdi. Telefon qo‘ng‘iroqlariga ham javob bermadi.
Vazirlikning Qashqadaryo viloyatidagi vakili, viloyat Sog‘liqni saqlash boshqarmasi axborot xizmati rahbari Nuriddin Egamov esa mazkur masala to‘liqligicha vazirlik nazoratida ekanini, ishchi guruh viloyatga qachon kelgani va uning tarkibida nechchi kishi borligi haqida ma’lumotlar unga ma’lum emasligini aytdi.
“Men shu ikki nafar ayol vazirlik yuborgan ishchi guruh tarkibida bor deb yuribman. Maxsus ishchi guruh vakillari boshqa bo‘lsa, ulardan xabarim yo‘q”, — deydi Nuriddin Egamov.
“Daryo” voqealar rivojini kuzatishda davom etadi.
Izoh (0)