Австралия, Япония, Янги Зеландия, Буюк Британия ва АҚШ Тинч океанида ҳамкорлик бўйича янги ташкилот — Partners in the Blue Pacific (PBP, Тинч океани минтақасидаги шериклар)ни тузди, деб ёзади «РБК» Оқ уй сайтига таяниб.
«Бугун бешта мамлакатларимиз Тинч океанидаги бирламчи масалаларни янада самарали ва амалий қўллаб-қувватлаш учун кенг қамровли норасмий механизм — Partners in the Blue Pacific (PBP)’ни ишга туширди», — дейилади хабарда.
Ташкилот ўз олдига учта асосий вазифани қўйди, булар:
- Тинч океани ороллари форуми томонидан ишлаб чиқиладиган минтақа учун 2050 йилгача бўлган стратегияга (у сиёсат, иқтисодиёт, хавфсизлик, экология каби еттита соҳани ўз ичига олади, шу йилнинг июлида тақдим этилиши керак) мувофиқ минтақадаги бирламчи вазифаларни қўллаб-қувватлашга кўпроқ куч йўналтириш.
- Тинч океани регионализмини мустаҳкамлаш ҳамда минтақа ҳокимиятлари ва PBP’га аъзо мамлакатлар ҳукуматлари ўртасидаги алоқани йўлга қўйиш.
- Тинч океани минтақаси ва дунё ўртасидаги ҳамкорлик учун имкониятларни кенгайтириш.
Апрелда АҚШ ўзининг Тинч океанидаги иттифоқчилари, шу жумладан, Австралия, Япония ва Янги Зеландия билан ҳамкорликни кучайтириш ниятини маълум қилганди. Таъкидланишича, Вашингтон «XXI асрнинг денгиз хавфсизлиги ва иқтисодий ривожланишдан тортиб иқлим инқирози ва COVID-19 гача бўлган муаммоларини ҳал қилиш учун ўзининг минтақадаги иштирокини фаоллаштиришга» қарор қилган.
Ушбу баёнот Хитойнинг Тинч океани жануби-ғарбий қисмидаги Соломон ороллари билан иттифоқчилик ва хавфсизлик соҳасидаги ҳамкорлик ҳақида шартнома тузиши фонида берилганди. АҚШ ва унинг иттифоқдошлари ҳужжат имзоланиши юзасидан хавотир билдирган, чунки, уларнинг фикрича, бу битим Тинч океани минтақасида эркин савдога хавф солиши мумкин.
Изоҳ (0)