Andijon viloyati Bo‘ston tumani va Qoraqalpog‘istonning Taxtako‘pir tumanida subsidiya mablag‘ini talon-toroj qilgan korxona rahbarlari aniqlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Bo‘ston tuman bo‘limi tomonidan tergovga qadar tekshiruv o‘tkazilgan. Unda B.M. ishlab chiqarish kooperativi rahbari R.K. tuman Aholi bandligiga ko‘maklashish markaziga 50 nafar fuqaroning bandligini ta’minlagani haqidagi soxta ma’lumotlar kiritgani aniqlangan. U jami 122,5 million so‘m subsidiya mablag‘ini ajratilishiga erishib, talon-toroj qilgan.
Bundan tashqari, departamentning Taxtako‘pir tuman bo‘limi tomonidan tergovga qadar tekshiruv o‘tkazilgan. Unda “SH.B.” MCHJ mansabdor shaxslari tuman Aholi bandligiga ko‘maklashish markazida ishsiz sifatida ro‘yxatga olingan va subsidiya ajratish haqida murojaat qilgan 16 nafar fuqaroga issiqxona qurib berish uchun hisob-raqamiga o‘tkazib berilgan 89 million so‘mni o‘zlashtirgani aniqlangan. Ular pullarni kredit qarzdorligini so‘ndirishga hamda MCHJning savdo do‘konini qurishga sarflab, talon-toroj qilgan.
Holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 207-moddasi (mansabga sovuqqonlik bilan qarash) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Mavzuga doir:
- Sergelida aholidan kommunal to‘lovlar uchun yig‘ilgan qariyb 100 mln so‘mni talon-toroj qilgan shirkat aniqlandi
- Qashqadaryoda bank xodimlari 150 nafar fuqaroning pensiya va nafaqa pullarini talon-toroj qilgani aniqlandi
- Sirdaryoda 21 mln so‘m zararni hisobotga kiritmaslik uchun tadbirkordan pul olgan mansabdor ushlandi
Izoh (0)