Tashqi ishlar vaziri vazifasini bajaruvchi Vladimir Norov 24-iyun Eron prezidentining Afg‘oniston bo‘yicha maxsus vakili Hasan Kazemi Kumiyni qabul qildi. Bu haqda TIV axborot xizmati xabar qildi.
Qayd etilishicha, uchrashuvda Afg‘onistondagi vaziyat yuzasidan fikr almashilgan. O‘zbekiston—Eron hamkorligining bugungi holati va uni rivojlantirish istiqbollari, shuningdek, Afg‘oniston masalasi bo‘yicha tomonlarning o‘zaro hamkorligi muhokama qilingan. Tomonlar Afg‘onistonni mojarodan keyin qayta tiklash, afg‘on xalqiga gumanitar yordam ko‘rsatish va mintaqaviy jarayonlarga jalb qilish masalalari bo‘yicha konstruktiv muloqotni davom ettirishga tayyorligini bildirgan.
Eron tomoni 2022-yil iyul oyida Toshkentda o‘tkazilishi rejalashtirilgan Afg‘oniston bo‘yicha xalqaro konferensiya ishida ishtirok etishini tasdiqlagan. Muloqot davomida O‘zbekiston va Eron tomonidan Afg‘onistonda infratuzilma, transport va energetika loyihalarini amalga oshirish masalalariga e’tibor qaratilgan.
Muzokaralarda O‘zbekiston prezidentining Afg‘oniston bo‘yicha maxsus vakili Ismatilla Ergashev ham ishtirok etgan.
Izoh (0)