Sergelida aholidan kommunal to‘lovlar uchun yig‘ilgan qariyb 100 mln so‘mni talon-toroj qilgan shirkat aniqlandi

Toshkent shahrining Sergeli tumanida aholidan kommunal to‘lovlar uchun yig‘ilgan pullarni o‘zlashtirgan xususiy uy-joy mulkdorlari shirkati aniqlandi, deb xabar beradi Bosh prokuratura huzuridagi departament.

Ma’lum qilinishicha, departamentning Sergeli tuman bo‘limi tomonidan fuqarolarning huquq va manfaatlarini himoya qilish yuzasidan tergovga qadar tekshiruv o‘tkazildi. Tekshiruv davomida tumandagi Sergeli-5 mavzesida joylashgan 6 ta ko‘p qavatli uyga xizmat ko‘rsatuvchi “A.B.” xususiy uy-joy mulkdorlari shirkati moddiy javobgar shaxslari xonadon egalaridan kommunal to‘lovlar uchun yig‘ilgan 97,7 million so‘mni bank kassasiga kirim qilmasdan ,talon-toroj qilgani aniqlangan.

Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Surxondaryoda shirkat rahbari ta’mirlash va qurilish ishlari uchun ajratilgan puldan 525,2 million so‘mni o‘zlashtirgani, Sergelida shirkat rahbari xonadon egalaridan undirilgan 431 mln so‘mni talon-toroj qilgani to‘g‘risida xabar berilgandi.