Lionel Messi bolaligidayoq butun Rosarioni (Messi tug‘ilgan shahar) dahshatga solgandi. “Nyuells Old Boyz”ning bolalar jamoalari murabbiylari hatto Leoning turli musobaqalarda urgan gollarini sanashni to‘xtatib qo‘ygandi, biroq uning 500 tadan ko‘proq marta darvozani ishg‘ol qilgani aniq. Messining jamoasi raqiblarini shafqatsizlarcha qiynardi, har bir o‘yinda kamida 10—12 tadan gol urilardi. Hatto ba’zi jamoalar o‘zlari uchun qoida o‘ylab topib olgandi: “Nyuells” oltinchi golni urgandan keyin ortiqcha qiynalmaslik uchun birdaniga o‘yinni tugatib qo‘yish.
Messida to‘xtab qolmaslik va atrofdagilarni o‘ziga yaqinlashtirmaslik uchun alohida motivatsiya bo‘lgan. Uning o‘sha vaqtdagi murabbiyi Karlos Markoni Messiga har bir gol uchun shirinlik berardi. Agar Messi 4 ta gol urgan bo‘lsa, mos ravishda xuddi shuncha mukofotga ega chiqardi.
Leoning yanada yaxshiroq bo‘lishi uchun murabbiy unga bosh bilan urilgan golga ikkita shirinlik va’da qiladi. “Keyingi o‘yinda Leo barcha himoyachilar va darvozabonni aldab o‘tdi va to‘pni tepaga ko‘tarib, bo‘sh darvozaga boshi bilan gol urdi. Shunda u menga qaradi va barmoqlari bilan ishora qilib, endi ikkita berasiz dedi”, — yodga oladi Markoni.
Biroq Messi 9 yoshdaligida “Nyuells” murabbiylari Leoda muammolar borligini payqab qoldi. Barcha sheriklari bo‘y borasida undan baland edi, Messi 1 metr-u 27 santimetr bo‘lgan. Hatto Leoning oynadan atrofni kuzatishi uchun mashina o‘rindig‘iga qo‘shimcha yostiq qo‘yilardi.
Bu uning musobaqalardagi muvaffaqiyatlariga ta’sir ko‘rsatmayotgan, biroq kelajakda katta muammolarni keltirib chiqarishi aniq edi: Leo bunday bo‘y bilan yakkakurashlarga kira olmasdi. Shu tariqa chuqurlashtirilgan tekshiruvdan o‘tishga to‘g‘ri keladi.Leoni qutqarib qolgan shifokor
Shu tariqa 9 yoshli Messida organizmning rivojlanishi uchun nihoyatda muhim bo‘lgan o‘sish gormoni yetishmovchiligi aniqlanadi. Rosarioda Messi bilan ikki yarim yil ishlagan endokrinolog Diyego Shvarsshteynning so‘zlariga ko‘ra kasallik juda kamyob bo‘lib, o‘rtacha 20 ming boladan bir nafarida uchraydi.
Bunday hollarda o‘sish gormoni bilan davolash tayinlanadi — tananing xususiyatlariga va reaksiyasiga qarab 3—6 yil davomida qo‘l va oyoqlarga muntazam ravishda kunlik inyeksiya qilib boriladi. Professional sportda bunday inyeksiyalar taqiqlangan, chunki agar gormon sog‘lom odamning organizmiga yuborilsa, bu mushak massasining o‘sishiga yordam beradi. Lekin Messi, birinchidan, gormonni bolaligida qabul qilgan, ikkinchidan, buni aniq tibbiy maqsadlarda qilgan, shu bois bu ukollarni doping deb hisoblab bo‘lmasdi.
“Men maydonda ham, maktabda ham, mahallada ham eng kichigi edim. Shuning uchun har kuni oyog‘imga ukol qilishardi. Kunlar kunlarga, haftalar esa haftalarga ulanib bordi va bu narsa uch yildan ko‘proq davom etdi”, — deydi Messi.
Qabullarda Leo shifokor Shvarsshteynga deyarli hamma narsa haqida gapirib berardi — har o‘yinda nechta gol urishi, jamoasi qanday musobaqalarda qatnashishi, nimalarga erishmoqchiligi. Kunlarning birida shifokor Messiga shunday deydi: “Maradonadan yaxshiroq bo‘lasanmi yoki yo‘q, bilmadim-u, ammo bo‘ying undan baland bo‘lishi aniq”.
Hammasi ko‘ngildagidek chiqdi. Hozir Messining bo‘yi 1 metr 69 santimetrga teng. U marhum Diyego Maradonadan ikki santimetrga balandroq.
Argentinadagi davolanish kursi to‘xtab qoladi, Barselonaga uchishga to‘g‘ri keladi
Biroq davolanish yo‘li qiyinchiliklarsiz o‘tmaydi. O‘tgan asrning 90-yillari oxiri va 2000-yillarning boshida Argentina kuchli iqtisodiy inqirozni boshidan kechiradi, bu 2001-yilda davlat tomonidan qarzlarning to‘lanmasligi, prezidentning iste’foga chiqishi va o‘rta sinfning qulashiga olib keladi.Davolanishning dastlabki ikki yarim yili Lionelning otasi ishlagan po‘lat zavodi sug‘urta fondi hisobidan to‘langandi. Inqiroz avj olgach, barcha sug‘urta to‘lovlari qisqartiriladi va Messi o‘sish gormonisiz qoladi. Ukol kursining narxi oyiga 900 dan 1300 dollargacha bo‘lgan. Oilada esa bunday pul yo‘q edi.
Xorxe Messi avvaliga “Nyuells Old Boyz” rahbariyatiga murojaat qiladi, u klub o‘zining asosiy iqtidorini qutqarib qolishiga umid bog‘lagandi, biroq yakunda adashga bo‘lib chiqadi. Boisi inqiroz futbol klublariga ham ta’sir qilib bo‘lgandi.
“Ular davolanishga ketadigan mablag‘ni to‘liq ko‘tarishini va xavotir olmasligimni aytdi. Ammo keyinchalik arzimagan summa berishdi. Agar ular davolanishga pul to‘laganida, albatta, Rosarioda qolgan bo‘lardik”, — deb eslaydi Leoning otasi o‘sha damlarni.
Messilar oilasi zudlik bilan najot yo‘llarini izlashga tushadi: davolanish kursini uzoq vaqtga to‘xtatib bo‘lmasdi. “Kursning keskin to‘xtab qolishidan hech qanday nojo‘ya ta’sirlar yo‘q, lekin agar Leo gormonni qabul qilishni to‘xtatganida, hozirgidan ancha pastroq — 1 metr 50 santimetr atrofida bo‘lardi”, — deydi shifokor Shvarsshteyn.
Ko‘p o‘tmay oilaga Messining ajoyib iste’dodi haqida eshitgan va “Barselona” vakillari bilan tanish bo‘lgan buenos-ayreslik ikki tadbirkor yordam beradi. Shu tariqa Xorxe Messi “Barselona”ning eng muhim xodimlaridan biri bo‘lgan Xosep Mariya Mingelya bilan tanishadi. U klubga o‘tgan asrning 70-yillarida tarjimon sifatida kelgan, keyin murabbiy, yoshlar jamoalari ma’muri, skaut va hatto o‘yinchilar menejeri sifatida faoliyat yuritgandi. U “Kamp Nou”da Diyego Maradona, Romario va Xristo Stoichkovlarning transferlarida ishtirok etgan. Keyinchalik bu ajoyib kelishuvlar ro‘yxatiga Messi nomi ham qo‘shiladi.
“Leoni ilk marta 12 yoshdaligida ko‘rganman. U past bo‘yli, nimjon edi, jismoniy imkoniyatlari tufayli uning yaxshi o‘yinchi bo‘la olishiga shubha bo‘lgan. Lekin ko‘rikdan keyin shunchaki hayratda qoldim. Leo ajoyib odamlar: me’morlar, shifokorlar, buyuk musiqachilar tug‘iladigan aql bovar qilmaydigan sayyoradan kelganga o‘xshardi”, — deya eslaydi Mingelya.
“Barselona” dastlab Messiga unchalik ham qiziqmaydi, biroq Mingelya klub pozitsiyasini o‘zgartirish uchun qo‘lidan kelgan hamma ishni qiladi. U Lionel va uning otasiga Ispaniyaga uchish uchun chipta olib beradi, hattoki Barselonada yashash uchun ham pul to‘laydi.
“Mashg‘ulotlarda Leoning nimalarga qodirligini hamma ko‘radi, muhokamalar haftalab davom etadi, lekin hech kim qaror qabul qilmasdi: kimdir Messini yoqtirar, boshqalarni esa uning bo‘yi ikkilantirardi. O‘shanda klub prezidenti maslahatchisi Xoan Gasparga qo‘ng‘iroq qilishga qaror qildim va u sinov o‘yinini belgiladi”, — deydi Mingelya.
O‘yin “Kamp Nou” yaqinidagi sun’iy qoplamali maydonda bo‘lib o‘tdi, Leo o‘zidan yoshi katta bolalar bilan o‘ynadi, “Barselona” rahbarlari mana shunday og‘ir sharoitda uning rivojlanishi va davolanishiga sarmoya kiritish kerakmi yoki yo‘q degan savolga javob oladi. Messi esa barchani hayratda qoldiradi.
Biroq o‘sha vaqtga kelib, Messining otasi “Barselona”dan nimadir chiqishiga ishonmay qo‘ygandi. U kataloniyaliklarni ham xuddi “Nyuells Old Boyz” kabi aldab, hech qanday shartnoma taklif qilmaydi degan fikrda edi.
Xorxe Messini tinchlantirish uchun Mingelya va klub prezidenti maslahatchisi vaqtinchalik shartnoma tayyorlaydi. Bu kelishuv 2000-yilning 14-dekabrida Montjuik tog‘laridagi restoranda “salfetka”ga yoziladi. Kelishuv Messi bilan tez orada to‘liq junior-shartnoma imzolanishini kafolatlardi. Shu bilan birga Lionelning otasiga “Barselona” akademiyasi tizimidan ish beriladi.
Hujjatlar 2001-yil martigacha tayyorlanadi, davolanish esa imkon qadar tezroq o‘tkazilishi zarur edi. Natijada, o‘sish gormoni inyeksiyalarining birinchi kursini “Barselona” bosh direktori Joan Lakueva o‘z yonidan to‘laydi. U Messining otasiga shaxsiy jamg‘armasidan pul beradi.
Lionelga ko‘rsatilgan g‘amxo‘rlik deyarli cheksiz edi. 2001-yil dekabr oyida uning maoshi oshiriladi (bundan tashqari, u “Barselona B” futbolchisi sifatida akademiyadan ham maosh olardi), otasiga Barselonadagi kvartirani ta’mirlash uchun pul o‘tkazib beriladi.
Shu voqealardan besh yil o‘tib, Leo hech narsa behuda ketmaganini isbotlaydi. 10 yildan keyin esa tom ma’noda afsonaga aylanadi.
“Barselona” davolanishim uchun pul to‘lashga rozi bo‘lgan yagona klub edi. Klub men uchun qo‘lidan kelgan barcha ishni qildi, unga kerak ekanman, shu yerda o‘ynayveraman”, — degandi Messi.
Biroq 2021-yilga kelib, Messi ko‘zida yosh bilan uyi — “Barselona”ni tark etdi. Biroq bu endi umuman boshqa hikoya...
Izoh (0)