КХДР раҳбари Ким Чен Ин мамлакат қуролли кучларини қайтадан ташкил этади, деб ёзади KCNA.
Ким Чен Ин Корея Меҳнат партиясининг Марказий ҳарбий комиссияси йиғилишини ўтказди. Унда КХДРнинг «мудофаа қобилиятини мустаҳкамлаш ва ривожлантириш» муҳокама қилинди. Хусусан, «қуролли кучларни янада кучайтириш ва мустаҳкамлаш», шунингдек, ҳарбий ташкилотларни «штат жиҳатидан қайта қуриш» режаси маъқулланган.
КХДР армияси тузилмаси айнан қандай ўзгариши номаълум, аммо таъкидланишича, «Марказий ҳарбий қўмита раиси ўринбосарлари раҳбарлиги остида» Корея халқ армияси бош штаби «тегишли масалаларни кўриб чиққан ва муҳокама қилган».
Бундан ташқари, қўмита мажлисида Шимолий Корея етакчиси Ким Чен Ин «фронтдаги қўшинларнинг ҳарбий ҳаракатлар бўйича қобилиятларини ошириш» учун чора-тадбирларни баён қилган.
«Бош котиб ҳозирги пайтда олиб борилаётган кураш чоғида оғир синовларни қатъият билан енгиб ўтишимиз кераклигини айтиб, бунинг учун Корея армиясининг мутлақ кучи ва ҳарбий-техник қудратини доимий сақлаб туриш ва тинимсиз ошириш кераклигини таъкидлади», — дейилади Корея Марказий телеграф агентлиги хабарида.
Аввалроқ экспертлар КХДР кетма-кет ядро синовларига тайёрланаётган бўлиши мумкинлигини маълум қилганди. Яқинда сунъий йўлдошдан олинган фотосуратлар Шимолий Корея ядро полигонидаги фаолликни кўрсатди, у қўшимча ядро синовлари ўтказилишидан далолат бериши мумкин.
Изоҳ (0)